Пичи Пурга ёросысь маскарчиос «Удмурт гурт stand-up» ужрадын ӵошатскозы
Со ивортэмъя, Пичи Пурга ёросын трос маскарчиос но серемес веросъёс гожъясьёс. «Удмурт гурт stand-up» вожвылъяськонын соос асьсэлэсь быгатонлыксэс «Гуртэ мынам» темая возьматозы. Со сяна, ужрад удмурт кылэз азинтонлы но сӥземын.
«Котьку но удмурт кылынгес турттӥськом таӵе ужрадъёс ортчытыны, удмурт кылмы но медаз быры шуыса, удмурт кылын тросгес мед вераськомы, удмурт кылын тросгес гожъясьёсмы мед луозы шуыса», — шуиз Людмила Шумилова.
Маскаръяськонъя ужрадэ 16 аресысен вань мылкыд карисьёс одӥг яке кык асьсэ гожтэм юморескаен пыриськыны быгато. Веран одно ик удмурт кылын луыны кулэ, кузьдалаез — 5 минут. Кык муртэн но выступление дасяны яра. Устоез маскарчи 2 сюрс манетъем премия утоз, нош учкисьёслы тужгес кельшемезлы нимысьтыз кузьым сётозы.
Людмила Шумилова пусйиз, та дырлы Пичи Пургаысь, Баграш-Биграысь, Эдэйгуртыс, Брангутрысь но мукет интыосысь мылкыд карисьёс куриськонъёссэс сётӥзы ни. Соос пӧлын егитъёс но, мӧйыос но вань.
«Мон тодӥсько, аслэсьтыз куронзэ сётӥз Светлана Зайцева, солы 20 арес но ӧвӧл ай. Со Орлойысь. <…> Милям, зэмзэ но, потэ вал тросгес пиналъёс, егитъёс мед луозы шуыса. Ну ми ужаськом, авторъёсын ужаськомы, чаклалом ни», — шуиз Людмила Шумилова.
Пичи Пурга ёрос лыӟетъюртэн кивалтӥсь вермъя, ужрадэз ортчытон инты но юнме быръемын ӧвӧл: Куреггуртысь калыкен соос кемалась кусып возё ни, отын котьку но шулдыр пумитало. Со сяна, ӵошатсконлэн «Удмурт гурт stand-up» нимыз бере, ужез радъясьёс гуртэ ик потыны малпазы.
Ватсалом, «Удмурт гурт stand-up» вожвылъяськонэз тодмо гурт песянайёс Орлойысь Дуни но Пичи Пургаысь Сандӥ нуозы. Озьы ик калыкез нимысьтыз ӧтем куноос — Бобья-Уча гуртысь «Маскара» элькун фестивальлэн вормисьёсыз «Тыпыр-тапыр» команда — шулдыртозы.
Тодэ вайытом, 13-тӥ коньывуонэ Эгра ёросын гуртысь маскарчиослэн «Шӧкычкар» элькун фестивальзы ортчиз.