Конкурсэ пыриськод – «Шундыкаре» сюрод

Туэ лагерь ортчоз 22-тӥ-31-тӥ гудырикошконэ (августэ) «Оранжевое настроение» лагерьын (Якшур-Бӧдья трактлэн 34-тӥ иськемаз). «Шундыкарлэн» ӧсъёсыз 18 аресозь нылпиослы усьтэмын. Туэ уж 11 ӧръя нуиськоз.

Быръем ӧрдыя лэсьтэм ужъёстэс келяно:

•  «Фольклор» отряд (5-тӥ-8-тӥ классъёс) – ёросады яке гуртады кылдэм 2 калык кырӟанэз быдэстэмдэс видеое гожтыса келяно. Сыӵе кырӟанъёс ӧвӧл ке, мукет удмурт калык кырӟанъёсты бырйыны яра. Огзэ кырӟанэз акапельно (фонограмматэк яке крезьгуро инструменттэк) кырӟано.
•  «Эстрада» отряд (8-тӥ-11-тӥ классъёс) – 2 пӧртэм пумо эстрадной кырӟанъёсты фонограмма улсын быдэстэмдэс видеое гожтыса келяно. Огзэ яра акапелла быдэстыны. Огез кырӟан одно ик удмурт кылын луыны кулэ, кыкетӥез – мылкыддыя.
•  «Театр» отряд (7-тӥ-11-тӥ классъёс) – 1-2 удмурт кылбур но 1-2 ӟуч кылбур дышетоно. Соосты лыдӟемдэс видеое гожтыса келяно. Со сяна, кыӵе ке арбериез кияды кутыса (кылсярысь, ручка, утюг…), 1 минутъем этюд дасяно (син азяды пуктоно, кызьы огшоры арбери улысал, луло луысал ке).
•  «Кибашлы» отряд (7-тӥ-11-тӥ классъёс) – Та юанъёслы валэкон сётыса, сочинение гожтоно: кыӵе станокъёсын тӥ школаын ужаськоды? Кудъёсыз соос пӧлысь тӥлед тужгес но кельшо? Пулэсь кыӵе арбериосты лэсьтэмды вань ни (асьтэ коже, дышетӥсенызы, атаеыны ӵош)? Марлы дышетскемды потэ смена ӵоже? Со сяна малпаськоно, кыӵе арбериез смена ӵоже лэсьтэмды потэ: вотэсысь 2-3 тупась туспуктэм шедьтыса, милемлы келялэ.
•  «Видеоискусство» отряд (8-тӥ-11-тӥ классъёс) – дэмлам ужъёс пӧлысь одӥгзэ быдэстоно: удмурт кырӟанлы 2-3 минутъем клип лэсьтоно; ужрадысь 2-4 минутъем репортаж дасяно; 5-7 минутъем фильм пӧрмытоно. Куриськонын пусъёно, кыӵе программаослэн юрттэменызы видео лэсьтэмын вал, кӧня ар ӵоже видеоискусствоен тунсыкъяськиськоды. Гожтоно, кыӵе тӥрлыкты съёмкаос понна вань, кыӵе компьютерной программаосын ужаны быгатӥськоды.
•  «Дӥськут дизайн» отряд (7-тӥ-11-тӥ классъёс) – Туала удмурт дӥськут малпано, кагаз вылэ 1-2 эскиз суредано. Уже одно ик басмаез но кутоно.
•  «Проектирование» отряд (7-тӥ-11-тӥ классъёс) – Гожтоно, мар сярысь проектты (500-1000 пус) но кыӵе шугъяськонэз со вормыны юрттоз (500 пус).
•  «Блогинг» отряд (7-тӥ-11-тӥ классъёс) – Вотэсысь «Даур ТВ» телеканал понна 1-5 минутъем видео дасяно (сое снимать но монтировать кароно). Пуштросэз пӧртэм луыны быгатэ: иворъёс, ВК-клип, видеомем, обзор… Видео одно ик удмурт кылын, ӟечлыко куараен гожтэмын луыны кулэ. Кадрын одно ик тӥ асьтэос но луыны кулэ. Видеоуждэс поттэлэ ВКонтакте #дауртв2023 но #шундыкар2023 хэштеген.
•  «Крезьгуро инструментъёсын шудон» (7-тӥ-11-тӥ классъёс) – Крезьгуро инструментъёсын (гитараен, арганэн, кубызэн…) шудэмдэс видеое гожтыса келяно. Яра 3 пӧртэм видео келяны, огаз соос пӧлысь калык кырӟанэз быдэстоно. Умой луоз, асьтэос ик кырӟады ке.
•  «Суредаськон» (7-тӥ-11-тӥ классъёс) – Акварелен, гуашен, пастелен яке буёло карандашъёсын А3 кагаз вылын суредам 4 уж келяно, котькудӥз соос пӧлысь арлэн пӧртэм вакытъёсызлы сӥземын луыны кулэ. Возьматэ, кыӵе луэ удмурт шаермы толалтэ, тулыс, гужем но сӥзьыл.
• «Туспуктон» (7-тӥ-11-тӥ классъёс) – 3 творческой уж быдэстоно:
  — Инкуазез туспуктыны ветлоно. 3 усто туспуктэмез быръёно но соосты «ВКонтакте» бамады нимаз фотоальбоме ватсано.
  — Кыӵе ке ужрадэс туспуктыны ветлоно. 10 усто туспуктэмез быръёно но соосты «ВКонтакте» бамады нимаз фотоальбоме ватсано. Гожтоно, кыӵе ужрадэз туспуктӥды.
  — Адямилы фотосессия ортчытоно, туспуктэмъёсады солэсь сямзэ, туссэ, мылкыдзэ возьматыны тыршоно. 10 усто туспуктэмез быръёно но соосты «ВКонтакте» бамады нимаз фотоальбоме ватсано. Гожтоно, мае та туспуктэмъёс пыр шараямды потэ вал.
  Туспуктэмъёс юри та конкурс понна лэсьтэмын луыны кулэ.
  Бӧрысь https://forms.yandex.ru/u/648eb305c417f328092d87b0/ чӧлсконъя анкетаысь юанъёслы валэктонъёс сётоно. Отчы ик ватсано нимаз дасям документэз, кудаз пусъемын нимтулды, туспуктэмъёсын альбомъёслы чӧлсконъёс но сётэм юанъёслы валэктонъёс: Кыӵе шуг-секытъёсын пумиськиды туспуктэмъёсты лэсьтыкуды но малы?

Ужъёстэс ыстоно 31-тӥ пӧсьтолэзёзь (июлёзь) таӵе адресъя: 426063, Ижкар, Орджоникидзе урам, 33-тӥ «а» юрт, 204-тӥ кабинет, удмурт егитъёслэн «Шунды» огазеяськонзы яке электрон почта пыр udmshundy@mail.ru адресъя.