Калыкъёслэн эшъяськон юртазы Пичи кенеш люкаськылӥз
Ужрадэз нуиз огазеяськонлэн Тӧроез Андрей Ураськин.
Пичи кенешмылэн ужаз пыриськизы — Росси Кун думаысь депутат Олег Гарин, Удмурт Элькунысь Кун Кенешлэн тӧроезлэн воштӥсез Татьяна Ишматова, Удмурт Элькунысь йӧскалык политикая министр Эдуард Петров, Удмурт Элькунысь лулчеберетъя министр Владимир Соловьев, «Удмурт Кенеш» огазеяськонлэн азьвыл кивалтӥсез Игорь Семёнов.
Ужрадмес кутским Удмурт кунлыкез одӥгез кылдытӥсьмес, югдытӥсьмес Трокай Борисовез сӥлы карыса. Синпелетэз доры сяська понӥм, Пичи кенешчиослэн нимынызы тау карим, йыбырттӥм. Сяськаен корзинаез нуыны оскемын вал Можгаысь Трокай Борисов нимо педколледжлэн директорезлы, Можга кар но ёрос кенешлэн кивалтӥсезлы Григорий Владимировлы, Алнаш ёрос Администрациысь дышетонъя Управленилэн кивалтӥсезлы, Алнашысь Ёрос Кенешлэн кивалтӥсезлы Галина Павловалы но «Удмурт Кенеш» огазеяськонлэн исполкомчиезлы Наталья Михайловалы.
Нош эскерим туннэ город вӧлмытлыкын кун кылъёслэсь кутӥськемзэс, кенешим урам нимъёс, дугдылон интыос, ужъюртъёслэн нимъёссы пумысен, удмурт кылъя нуиськись пӧртэм ужпумъёсты чаклам.
Валтӥсь докладъёсын вераськизы Удмурт Элькунысь йӧскалык политикая министр Эдуард Петров но Удмурт Элькунысь нимкылъёсъя комиссилэн кивалтӥсез Людмила Кириллова. Котьку сямен кылзӥм на Ёрос кенешчиослэн ужамзы сярысь но. Таяз радэ ивортон лэсьтӥзы Яр но Вавож ёросъёсысь огазеяськонъёслэн кивалтӥсьёссы — Ольга Барышникова но Ирина Ложкина.
Пичи кенешлэн кыкетӥ люкетыз сӥё-дано ӟечкыланъёсын азьланьтӥськиз.
«Удмурт Кенеш» огазеяськонлэн Трокай Борисов нимо Йӧскалык премиелэсь лауреатсэ шарам. 2024-тӥ ар понна лауреат луиз Золотарева Надежда – «Удмурт Кенеш» огазеяськонлэн Глазкарысь ветеран, уно аръёс ӵоже исполкоммылэн но Пичи кенешлэн ёзчиез, уйпал удмуртъёслы удмурт «Иднакар» газетэз кылдытӥсь, Глаз ёрос Думалэн I-тӥ но III-тӥ созывезлэн депутатэз.
Озьы ик сӥлы карим «Удмурт Кенешлэн» Данъян книгаяз пыртэм муртъёсты. Трос аръёс ӵоже удмуртлыкез калыке пыӵатэмзы, сямъёсты-йылолъёсты но лулчеберетэз утемзы но азинлыко тыршемзы понна «Удмурт Кенеш» огазеяськонлэн Данъян Книгаяз пыртэмын: Яр ёросысь лулчеберетъя но шутэтсконъя «Юбилейный» центр бордын ужась «Люр-ляр» нылпи театр коллективлэн кивалтӥсез, «Удмурт Кенеш» огазеяськонлэн Яр ёросысь ёзэзлэн азьвыл кивалтӥсез Валентина Дементьева, Пермь улосысь Куеда ёросысь удмурт фольклоръя «Тюрагай» калык ансамбльлэн кивалтӥсез, Пичи кенешлэн ёзчиез Физая Гарифуллина, Якшур-Бӧдья шор ёзо школалэн нылпи садысьтыз визьнодась, Ёрос кенешлэн правлениезлэн ёзчиез Роза Погосян, Алнаш ёросысь Байтэрек гуртысь яркыт семья: лулчеберетъя центрен кивалтӥсь Виталий Тарасов но лыдӟетъюртысь ӧнерчи Алевтина Тарасова, Балезино ёросысь Ушур школаысь удмурт кылъя но литературая дышетӥсь Перевощикова Надежда Ивановна.
Данъет басьтэмъёсты ӟечкыласа крезьгуро саламзэс кузьмазы Игра ёросысь Лия но Дмитрий Лекомцевъёс.
Пичи кенеш улсын ик удмурт егитъёслэн «Шунды» огазеяськонзылэн йылпумъянъёсын но быръёнъёсын азьвыл чакламтэ элькун конференцизы ортчиз. Егитъёс «Шунды» огазеяськонлэн куинь ар пала ужамезлы йылпумъянъёс лэсьтӥзы, азьвыл кивалтӥсез Виолетта Токарева (Анисимова) вераз кыӵе проектъёс радъямын но ортчытэмын вал та дыр ӵоже. Со сяна огкылысь быръемын вал огазеяськонлы выль правление, совет но тӧро. «Шундыен» кивалтыны оскемын Удмурт кун университетысь студентлы, Калыкъёслэн эшъяськон юртысьтызы ӧнерчилы Александр Ильинлы.