Калмезъёс нош ик пумиськизы

6-тӥ толсурэ Сюмси черкогуртысь ёрос культура Юртын йырвизь сынанъя «Шудо калмезъёс» ужрад ортчиз. Шудонэ пыриськиз Сюмси, Ува, Сьӧлта но Вавож ёросъёсысь 7 команда.

Шудӥсьёсты видео пыр ӟечкыласа вазиськизы Удмурт Элькунысь Кун Кенешлэн тӧроезлэн воштӥсез Татьяна Ишматова, Удмурт Элькунлэн Кун Кенешысьтыз ялан ужась ӧрилэн кивалтӥсез но «Удмурт Кенеш» огазеяськонлэн Тӧроез Андрей Ураськин. Ӟеч кылъёс озьы ик веразы Сюмси ёрослэн тӧроез Павел Кудрявцев но «Удмурт Кенешлэн» Сюмси ёзэтэзлэн кивалтӥсез Нина Южакова.

Шудо калмезъёс куспазы шудӥзы но удмурт кылын, лулчеберетлыкен но шаерен герӟаськем пӧртэм юанъёслы валэктоноъёс утчазы.

Шудонлэн кубокез кошкиз Сьӧлта ёросэ. Нош вуоно арын ужрадэз пумиталоз Ува ёрос.