Ижкарын «Вылез» пусйизы
Выль – вашкала дауръёсысь вуэм, удмуртъёслэн одӥгез яратоно шулдыръяськонзы. Со нырысь ик Инмарлы, Куазьлы но Кылдысинлы тау карон, выль вуэм емышъёсты данъян нунал. Озьы ик удмурт лулчеберетлэн, эшъяськонлэн праздникез луэ.
Сяме пыремъя, та нуналэ выль емышъёсты пӧраны кутылӥзы, выль изэм пызьлэсь нянь пыжылӥзы. Кузёос бусыысь ӟег но йыды шепъёс вайылӥзы но вӧсяллязы, бичам емышсы понна Инмарлы тау каризы. Тазалык, шудбур курыса солы вазиськылӥзы. Нош йылолъёсты быдэстэм бере ваньзы ик шулдыръяськыны люкаськылӥзы.
Тани туннэ но, ваньмы ӵошен кариськыса, вӧсям ӝук сиим, Инмарез данъям, ӟеч сётэм емышъёсызлы тау карим, собере шулдыръяським, концерт учким!
«Выль» празднике туж трос калык люкаськиз. Котькудӥз аслыз татын тунсыко уж шедьтӥз. Кин ке «Вузкарон урамын» кибашлыослэсь синпель кузьым басьтӥз, мукетъёсыз «Ческыт азбарын» пӧсь перепечен но табанен кунояськизы. Пиналъёс дырзэс пайдаё ортчытӥзы «Нылпи азбарын», мастер-классъёсы пыриськизы, йӧскалык шудонъёсын шудӥзы. Мылкыд карисьёс «Тазалыкъя азбарын» шутэтскизы, тазалыксэс чаклазы. Котькудӥз ӝук веръяз!
Люкаськемъёсты ӟечкылазы «Удмурт Кенеш» огазеяськонлэн Тӧроез, Кун Кенешысь ялан ужась ӧрилэн тӧроез Андрей Ураськин, шаерысьтымы Ӟуч культурая огазеяськонлэн азьветлӥсез Виталий Тюльпин.
Калыкез шулдыртӥзы «Чильтэр», «Задор мылкыд», «Ягдор», «Инвожо», «Инкрезь», «Эшъёс», «Тюрагай», «Инльӧль» ансамбльёс, «Виктория», «Сюрприз», «Отрада» нылпи коллективъёс, пичи кизили — Арина Севастьянова. Со сяна люкаськемъёслэсь мылкыдзэс ӝутӥзы удмурт эстрадаысь артистъёс — Геннадий Ганьков, Марина Галичанина, Артемий Гаврилов, Вероника но Юлияна Романоваос.