Дондыкарын ортчиз этнокультура инъето дышетонэз азинтонлы сӥзем семинар-практикум
18-тӥ коньывуонэ Глазов ёросысь Дондыкар шор ёзо школаын ортчиз этнокультура инъето дышетонэз азинтонлы сӥзем элькун семинар-практикум.
Отчы пыриськизы дышетӥсьёс, визьнодасъёс, школаен но нылпи садэн кивалтӥсьёс, Глазов ёросысь Дышетон Управлениысь ӧнерчиос но кенешчиос, научной кивалтӥсез — Элькунысь йӧскалык дышетонъя институтлэн директорез Надежда Ивановна Ураськина. Этнокультура дышетон удысъя эксперт луыса пыриськиз Росси Федерациысь дышетон удысысь отличник, педагогика тодосъя кандидат, «Удмурт Кенеш» огазеяськонлэн Ижкарысь Октябрь ёрос ёзэтлэн кивалтӥсез Валентина Михайловна Ившина.
«Ваньмылэн кылиз огъя мылкыдмы — шумпотэммылэн но и паймеммылэн пумыз ӧвол! Огшоры гурт школалэн рос-прос материально-технической базаез — ваньмыз лэсьтэмын нылпиос, анай-атайёс, дышетӥсьёс сярысь сюлмаськыса. Котькуд сэрегын шодӥське 30 арлэсь кема директорын ужам Николай Петрович Васильевлэн кибервылыз. Бадӟым спортзал вӧзысь тренажер зал, югыт но чылкыт сиськонни, дышетӥсьёслы, Учительской сяна, октэм-калтэм чебер шутэтскон сэрег, Калыкез дышетонъя узыр музей, «Удмурт корка» сэрег но трос мукет паймымонэз. Адӟимы туала директорлэсь Наталия Сергеевна Коротаевалэсь та кылдытэм йылолъёсты утьыны но азинтыны тыршемзэ, — вера мылкыдзэ Валентина Михайловна. — Школалэн ужан эсэпъёсызъя ке верано, туала этнокультура инъето дышетонын, анай кылмес утён но азинтон удысын туж лэчыт сылӥсь юанъёслы валэктон басьтыса кошким. Кызьы анай-атайёслэсь удмурт кыл шоры сӥялскем мылкыдзэс улӟытоно? Кызьы «нылпи сад + школа» кусыпъёсты, преемственностез кужмоятоно? Кызьы удмурт кыллы туж ӧжыт сётэм часъёс ӵоже но удмурт кылъя нылпиослы тыро-пыдо тодон-валанъёс сётоно?
Бускель но мукет улосвылъёсысь ӧнерчиослэн-экспертъёслэн чакланъёссы одӥг малпанэ вутто — тужгес но пайдаё луэ татын вань кужымъёсты (быгатонлыкъёсты но ресурсъёсты) огазеяса ужан амал, ӟуч кылын вераса, «сетевое взаимодействие как форма реализации этнокультурного образования». Сотэк школа но, семья но нимазы тыршыса но пычкиськыса, уз ӝутэ та ныпъетэз.
Ужрад улсын адӟыны луиз:
1. дышетон-урок пушкысь вань ресурсъёсты удмурт кыл вылэ «ужатон» (куд-ог предметъёсты, шуом, история, география, изо, музыка кадьёсты удмуртлыкен, удмурт кылэн огазеяса урокъёс сётон (интегрированная модель).
2. Дышетон сьӧркысь амалъёс (внеучебная деятельность): школаысь музей но библиотекалэн луонлыкъёсыз, кружокъёс, экскурсиос проектъёс. Со сяна, нылпиослэн ужрадъёсазы одно ик анай-атайёсты пыриськытон но удмурт кылын вань ужрадэз радъян.
3. Ватсаса тодон-валан басьтон луонлыкъёс (дополнительное образование) — гурт библиотека, гурт лулчеберетъя юрт, Устолыкъя школа. Со возын ик — Глазов Ёрос кенешлэн Глазов ёрос администрациысь Дышетонъя управлениен ӵош огкылысь сюлмаськемзы.
Вань та ёзэтъёслэн огазеям кужымзы юрттэ кылдытыны этнокультурая огъя вӧлмытлык. Со туж шӧдӥське пиналъёс вылын но, та ужын вань бергасьёс вылын но. Одӥг омырен шокам кадь — ог-огенызы висъянтэм герӟаськем сӧзнэт кылдытэ.
Тау кариськом Дондыкар школалэн азьвыл кивалтӥсезлы, удмурт кенешчилы Николай Петрович Васильевлы, туала кивалтӥсьлы Наталия Сергеевна Коротаевалы но научной кивалтӥсезлы Надежда Ивановна Ураськиналы, Глазов РУНО-ысь ӧнерчиослы. Туж оскиськом: та выль узыр опыт одно ик паськыт вӧлмытэмын луоз быдэс элькунамы.