Вавож удмуртъёслэн «Кипанча» гужем йылолзы ортчиз

Ужрад улсын люкаськемъёс эктӥзы, кырӟазы, сяська бичазы, панно но веник керттӥзы, мунчое пыризы, шурын пыласькизы, туж ческыт ӝук сиизы но турын чай юизы.

Ужрадэз радъязы но ортчытӥзы «Удмурт Кенеш» огазеяськонлэн Вавож ёросысь ёзэтэз но «Ошмес» нимо шутэтскон база. Нош Выль Биялась фольклоръя «Гербер» калык ансамбльлы луыса пумиськонзы эшшо но шулдыргес пӧрмиз.

«Удмурт Кенеш» огазеяськонлэн Вавож ёросысь ёзэтэз ивортэ:

«Вавож удмуртъёслэн Кипанча йылолзы сярысь тросэзлэн кылылэмзы но ӧвӧл. Мар веранэз, асьмеос, вавожъёс, гинэ но троссэ йылолэн герӟаськемзэ вунэтӥськом ини. Мӧйыосын вераськыса, тани мар тодӥм.

Пӧсьтолэзьлэн сизьыметӥ нуналаз ӟучъёслэн языческой Иван Купала, нош православнойёслэн Рождество Иоанна Предтечи праздникъёсынызы ӵош ми ортчытӥськом Кипанча сям-нергемес. Та нуналэ котькуд семьяын мунчо эсто, азьвыл ӝытаз котькудӥзлы сяськаен, ческыт зыно турынэн сураса бичам веник дасяло. Со веник лысву пӧлын уйзэ «пыласькыны» кулэ. Лысву тазалык кузьма. Веник пумез уг корало. Воргоронъёслы бадӟымесь веникъёс дасяло. Пӧлаз тыпы, кызьпу вайёсыз тросгес луэ, нош сяськаосыз – ӧжытгес. Нылкышноослы пичиесьгес веник кертто, кызьпу ваёгес каро, пӧлаз быдэн тыпы, палэзь вайёс поно. Егит нылъёслы дасям венике тросгес поно сяська, нош пичи пиналъёслы пичи сяська веник кертто.

Парем веникен кокаськыкузы, кызьпу кадь веськрес, тыпы кадь юн, сяська кадь чебер мед луо, та веник вань висёнъёсме мед басьтоз шуыса, кыл верало. Потон азязы гондыркуарен ӵушисько, гондыр кадь кужмо, провор мед луо шуыса. Мунчоысь потыкузы, солы мышкин султыса, вениксэс мунчо липет йылэ таӵе кылъёс вераса сэрпалто: «Вань висёнэ веник сьӧры мед кошкоз!» Чаклало вылэм на, кызьы веник липет вылысь усе: ныдыныз уллань ке, умойлы ӧвӧл. Веникез бичаса, шур кузя лэзё вылэм, веникен ӵош вань висёнэз, уродзэ шур ву мед нуоз, пе».