Алнашын улосчиоссэс Трокай Борисов но Герман Ходырев нимо ёрос премиосын пусйизы

Туэ Трокай Борисов йӧскалык ёрос премиез басьтӥзы:

Вениамин Васильевич Двоеглазов, ас дыраз Писейгуртысь Ильич нимо колхозэн кивалтӥз, тыршемез понна пусъемын трос пӧртэм таукаронъёсын, данъетъёсын. Нош али пенсиын ке но, тэк пукыны уг быгаты. Мыло-кыдо пыриське пӧртэм ортчись ужрадъёсы, ачиз кылбур гожъя, кырӟаны-вераны ветлэ «Азвесь гырлы» калык фольклор ансамбле.

Ямаков Николай Иванович, пор калыклэн «Одо Мари Ушем» мерлыко огазеяськонзылэн кивалтӥсез. Ас вакытаз улӥз Мари-Гондырево гуртын, ужаз школаын. Трос лэсьтӥз пор калыклэсь лулчеберетсэ, кылзэ, сям-йылолъёссэ элькунамы гинэ ӧвӧл, солэн палэназ но утён понна, тыршиз удмурт но пор калыкъёслэсь эшлыко кусыпъёссэс юнматон бордын.

Нош литературая Герман Ходырев нимо нылпи премиен алнашъёс данъязы:

Писейгурт школаысь Полина Осиповаез но Муважи школаысь литературая но творчествоя «Пушъетъёс» огазеяськонэз (кивалтӥсез Платонова Надежда Михайловна).

Пусъём, Трокай Борисов но Герман Ходырев нимо ёрос премиос Алнаш ёросын «Удмурт Кенеш» огазеяськонлэн ёрос ёзэтэзлэн кичӧлтэмезъя 2010-тӥ арысен сётӥсько.