Эшъяськон юртын радъяськиз «Вуюись» семинар

Ёросъёсысь семинаре вуэм егит ӧнерчиос, «Шунды» огазеяськонлэн тӧроез Ольга Тронина но мукетъёсыз вераськизы кызьы ёросъёсын пусйизы Анай кыллы сӥзем нуналэз, кыӵе выль малпанъёсын но ужрадъёсын уло ёросъёс.

Озьы ик егитъёс пумиськизы "Удмурт Кенеш"-лэн Президентэныз Татьяна Ишматоваен но ассоциациын егитъёс понна кыл кутӥсь вице-президентэныз Алексей Серебренниковен. Трос лэчыт но тунсыко юанъёс ӝутэмын вал котырес ӝӧк сьӧрын.

Йылпумъяськиз семинар PR технологиосты уже кутонлы сӥзем лекционно-практической занятиен. Нуиз сое Анастасия Бекмачева – Егитъёслэсь но нылпиослэсь огазеяськонъёссэс азинтонъя центрысь ӧнерчи.

Татьяна Ишматова пумиськон сярысь: «Туж пайдаё ортче туннэ «Шунды» огазеяськонлэн «Вуюись» нимо семинар. Вуэмын «Шунды» огазеяськонлэн ёрос ёзэсъёслэн кивалтисьёссы. Туж трос малпанъёссы но проектъёссы. Пумиськонмы умой ортчиз. Трос юанъёс сётказы егитъёс, дэмланъёссэс веразы. Кыче соос ӟечокъёс – зэмос сюлмаськон удмуртлык понна шӧдиське пуктэм юанъёссы пыр. Егит семьяслы саклык висъян понна дурбасьто, «Чеберай» конкурсэз ортчытъяно шуыса вазисько. Дэмлан сётӥзы выжтыны элькун ӵошатсконэз ёросъёсы но котькуд ар бырйыны мукет ёросэз. Туж сюлмаськытэ егитъёсты нылпи садъёсын удмурт пиналъёс ӟучомо шуыса озьы ик котькуд школаын удмурт кылэз одно ик дышотыны кулэ шуыса (обязательное изучение). Вераським на удмурт егит депутатэ мынисьёслы – кандидатъёслы одно ик юрттоно шуыса. Со понна вазиськылыны быгато «Удмурт Кенеш»-э. Шумпотымон асьмеос ог-огмес валаса ужаськом шуыса. Котькуд ёросын егитъёс «Удмурт Кенеш»-эн ӵош ужало но ужмылэн пайдамы шӧдиське шуыса. Озьы ик ог-огмылы юрттыса азьланяз но ужаны мед быгатом!»

Дом Дружбы народов
Добавить комментарий