Этно амалэн крезьгурасьёсты вожвылъяськонэ пыриськыны ӧтё Удмуртиын

Вожвылъяськонэ пӧртэм выжыысь потэм, пӧртэм интыын улӥсь мылкыд карисьёс пыриськыны быгатозы.

“Конкурс ортче ӧжытэзтэк котькуд ар, кӧня «ГуртFEST» фестиваль мынэ ини. Отчы пыриськыны быгатозы 16-40 аресъем кырӟаны, эктыны, калык инструментьёсын шудыны быгатӥсьёс”, – вера вожвылъяськонлэн кураторез, «Лудорвай» музейысь тодосъя ӧнерчи Анастасия Иванова.

Конкурс пӧртэм номинациосъя радъяськоз:

– калык эктон;

– ансамблен фольклор кырӟан (2-лэсь трос адямиен);

– одӥген кырӟан:

  • авторен гожтэм кырӟан;
  • фольклор кырӟан;
  • этно-поп крезьгур;

– крезьгуро арбериосын калык крезьгурез быдэстон (одӥген но ансамблен).

Конкурс кык люкетэн ортчоз. Нырысетӥез – заочной. Отчы пыриськон понна 1-тӥ гудырикошконозь конкурсэз радъясьёслы номинациосы тупась номерен видео келяно.

“Ми тодыны кулэ, яралоз-а конкурсантэз лэзьыны бадӟым сцена вылэ, сое трос адямиос учкозы но кылзозы уго, нимысьтыз жюри азьын гинэ соос асьсэзыз уз возьматэ. Соин бадӟым кылкутон со”, – шуэ  Анастасия Иванова.

Нырысетӥ люкетысь тужгес устоосэ ужъёсты 17-тӥ гудырикошконэ «ГуртFEST» фестивальлэн валтӥсь сцена вылаз возьматозы. Соослэсь быдэстэмзэс тодмо ансамбльёслэн кивалтӥсьёссы, калык крезьгурез эскерисьёс, лулчеберет удысын ужасьёс, кырӟасьёс, крезьгурчиос, кылбурчиос но мукет ӧнерчиос дунъялозы.

Вормисьёсты I, II, III интыос понна пусъёзы, со сяна, Гран-при но учкисьёслэсь кузьымзэс басьтӥсьёсты шараялозы.

Вожвылъяськонэз Удмуртиысь лулчеберетъя министерство юрттэм улсын «Лудорвай» музей но Лулчеберет кылёсбурез утёнъя но азинтонъя фонд радъяло.

https://udmurt.media/udm/news/kultura-i-turizm/59081/

 

Контентмейкер, мемолог и журналист

Дом Дружбы народов
Добавить комментарий