Эрик Батуев но Кузебай Герд нимо йӧскалык премиослэн лауреатъёссы тодмо луизы

Эрик Батуев нимо премиез басьтыны куать вазиськись вал. Ӧри соос пӧлысь куиньзэ бырйиз, со – «Мынам Удмуртие» телерадиокомпаниысь журналистъёс Светлана Белых, Светлана Пикулева но «Удмурт Дунне» газетысь валтӥсь редакторлэн воштӥсез Елена Миннигараева.

Вера «Мынам Удмуртие» радио пыр чузъяськись «Кыл дунне» программалэн авторез Светлана Белых: «Радиопрограммаям удмурт кылзӥсез анай кылмылэн дуннееныз тодматэме, тунсыкъяськонзэ улӟытэме потӥз. Со вераськон кыл гинэ ӧвӧл, со литература кыл но. Собере кылмылэн туж вашкала историез, кудӥз сярысь ми туж ӧжыт тодӥськом. Аръёс ортчыса радиоверанлэн ужпумез паськытаз – ӵошатэме потӥз, кызьы ас кылзэс утён бордын ужало мукет калыкъёс».

Озьы ик шараямын Кузебай Герд нимо йӧскалык премиез басьтӥсьёс, – со Можгаысь крезьгурчи, «Марӟан» ансамбльлэн кивалтӥсез Вячеслав Кудрявцев, Пичи Пургаысь Василий но Татьяна Москвинъёс но Эстониысь гожъясь Арво Валтон.

Тодады вайытом, Эрик Батуев нимо йӧскалык премия удмурт лулчеберет, история, удмуртъёслэн ужрадъёссы сярысь ивортӥсь журналистъёслы 2011-тӥ арысен сётӥське. Пӧртэм аръёсы лауреатъёсыз луизы ини Георгий Грязев, Елена Слесарева, Зинаида Рябинина, Ульфат Бадретдинов но мукет журналистъёс.

Кузебай Герд нимо йӧскалык премия 1992-тӥ арысен, удмуртъёслэн Нырысетӥ Ӧтчамзылы ар тырмон нулалызлы сётӥське. Соин удмурт лулчеберетэз, сям-йылолъёсты азинтӥсьёсты, утисьёсты, удмуртъёслэсь шуг-секытъёссэс сэрттӥсь- пертчисьёсты пусъё. 

Дом Дружбы народов
Добавить комментарий