Элькунысь удмуртъёс вуылӥзы Екатеринбургысь удмуртъёс доры

Нырысетӥез пумиськон ортчиз Верхняя Пышма карысь огаз школаын. Ӵапак татын дас арлэсь кема ни арня нуналъёсы удмурт кылэз дышетонъёс радъясько. Пырисько пиналъёс но, арлыдоос но. 
Пышмалы матын улӥсь удмуртъёс тросэз «Шудбур» нимо клубе ветло. Лулчеберетъя огазеяськон арнялы быдэ пумиськылыны тырше: пӧртэм шулдыръяськонъёсты ортчыто, бускель улосъёсы но ужрадъёсы потало. 
Свердловск улосын удмуртъёс пазгиськемын. Соосты огазеяны секыт. Соин но улосын кык бадӟым огазеяськонъёс ужало – «Эгес» но «Урал Кенеш». Удмуртъёсты тодмоос пыр утчало-шедьто, ӵош карискыны юртто. Берло аръёсы «Урал Кенеш» пӧртэм ёросъёсын 4 ансамбль кылдытӥз, удмурт лулчеберетъя кык центр усьтӥз.
«Берпуметӥез 2014-тӥ аре кылдӥз, – шуэ «Урал Кенеш» огазеяськонлэн кивалтӥсез Георгий Шамшияров. – Дегтярскын ужаны кусткиз Ирина Зайнуллина. Со «Пукон корка» проект гожтӥз но соя ужаны кутскиз. Ачиз со Дегтярск карысь валтӥсь лыдӟиськонниын методист луыса ужа. Солэсь проектсэ умоен лыдъязы мэриын, сое ассэ кутӥзы межнациональной комиссие». 
Пусйымон, берло аръёсы Свердловск улосысь удмуртъёс сярысь трос ивортонъёс вуо. Соос Удмурт Элькунын, Башкортостанын, Премь шаерысь удмуртъёс доры вуыло, асьсэ дорын куноосты но пумитало. 
Дом Дружбы народов
Добавить комментарий