Эгра ёросэ ветлӥсь туристъёслэн лыдзы ар ӵоже кык поллы йылӥз

«Оглом туризмез но гурт туризмез азинтонлы Удмуртилэн тӧроез нимысьтыз саклык висъя. Туннэ асьмеос ар ӵоже ужамлы йылпумъянъёс лэсьтыны но матысь толэзьёслы валтӥсь ужпумъёсты пусйыны кулэ. Югдур мыным тодмо, но азьлань мынон понна куд-ог ужпумъёсты ӵошен эскерыны кулэ», – шуэ Александр Свинин, Удмуртиысь кивалтэтлэн тӧроезлэн нырысетӥ воштӥсез.

Дунъясьёслэн чакламзыя, Сепе эшшо тросгес туристъёс лыктысалзы, но али куноосты уйлы интыяны нокытчы, матысез кунокуа 15 иськемын.

Александр Свинин кунокуа улэ муниципал музъемез дунтэк висъян пумысен ужпумез ӝоггес сэрттыны-пертчыны куриз но гурт туризме коньдонзэс поныны мылкыд карись ужбергатӥсьёс элькунын шедёзы шуыса пусйиз.

Со сяна, Сепын улӥсьёслэн туала интернетсы но мобильной герӟетсы ӧвӧл. Информатизацияя но герӟетъя министрез Тимур Меджитовез Свинин мобильной герӟетъя операторъёсын кенешон ортчытыны куриз.

Гуртэз азинтон улсын азьланяз Сепын Лулчеберетъя квартал усьтозы, отын кӧня ке выль объектъёс луозы, кылсярысь, обсерватория. Чакламын ярдурез умоятыны, тол шудонъёслы инты кылдытыны.

Удмуртиысь гурт возёсъя но сиён-юонъя министрлэн Ольга Абрамовалэн кылъёсызъя, 2017-тӥ арысен «Гурт интывылъёсты ялан азинтон» программая интыысь кичӧлтонъёслы юрттон вылысь грантъёс висъясько. Кылем арын элькун 3 миллион 500 сюрс манет басьтӥз (Россиын 10-тӥ инты но Приволжск федерал округын – 1-тӥ), таяз арын 2 миллион 700 сюрс манет возьмало. Сое куинь ӵектосъёслы сётозы: Глаз ёросысь Коӵыш гуртын йӧскалык шудонъёсъя интерактивной музей кылдытыны, Шаркан ёросын «Пупья азбар» юртъер котырез умоятонлы, Эгра ёросысь этапной пунктэз-музеез азинтыны.

https://udmurt.media/udm/news/kultura-i-turizm/40520/

 

Поделитесь с друзьями:

Контентмейкер, мемолог и журналист

Дом Дружбы народов
Добавить комментарий