«Шудком» удмурт визьбур клуб кыкетӥ сезонэзлэсь нырысетӥ шудонзэ ортчытӥз

Шудон куинь люкетэн мынэ, котькудаз быдэн 9 юан, кудъёссэ «Что? Где? Когда?» шудонлэн Удмуртиысь лигаез дася. Соос пуштроссыя туж пӧртэмесь, но пӧлазы одно ик вань Удмуртиен, удмуртлыкен герӟаськемъёсыз. Куд-ог юанъёслы валэктонъёсты визьрадэз бергатыса шедьтыны луэ, мукетъёсызлы — тодон кулэ. Кылсярысь, Удмурт калык суредасьлэн Пётр Ёлкинлэн одӥгаз суред вылаз крезен шудӥсь кышномурт возьматэмын. Тодыны кулэ вал, кин пиосмурт отын суредамын? Шонер валэктон сётыны быгатӥзы «Быдӟым улосчимылы П. И. Чайковскийлы сӥзён» ужзэ тодӥсьёс.

«Нырысетӥ тураз чузъяськем юанъёс туж шуг потӥзы. Котькуд нунал огкадь сямен ужась йырвизе шудонлэн кутсконаз ӧз вала кадь, мар солы выль ситуациын кароно. Со сяна, куд-ог формулировкаос укыр секытэсь но валантэм вал. Оглом вераса, визьсынан удалтӥз кадь малпасько», — вераз шудон бере «Намер но эшъёс» командаын шудӥсь, иворъёсъя «Удмуртия» агентствоысь корреспондент Алёна Григорьева.

«Горд сюлык» нимын команда кылдытӥз удмурт анайёслэн клубзы. Командалэн капитанэз, кыккылолыкъя «Билингва» удмурт центрлэн кивалтӥсез Татьяна Волкова верамъя, нылкышноос нылпиосын гинэ вырыны кулэ ӧвӧл, кыӵе ке ужрадъёсы но потаны кулэ.

«Йырвизез сынаны таӵе ужрадъёсын — со туж умой. Сомында выль кужым, сомында выль мылкыдъёс кылдӥзы. Малпасько, вуоно шудонэ ми одно ик пыриськом, но составмы мукетгес луоз, воргоронъёс одно ик луыны кулэ. Малы ке шуоно нылкышноос корка котырынгес, нылпиос котырынгес, нош воргоронъёслэн паськыгес мышленизы», — вераз Татьяна Волкова.

Таяз радэ вормиз Удмурт кун университетысь Историяя факультетысь выпускникъёслэн но студентъёслэн «Виквак» командазы.

Удмуртиысь йӧскалык политикая министерствоысь валтӥсь ӧнерчи Елизавета Ложкина верамъя, вуоноез шудон оштолэзе ортчоз. Озьы ик чакламын куартолэзе, собере коньывуонэ, шуркынмонэ но тулыспалэ люкаськылыны.

Тодэ вайытом, «Шудком» удмурт визьбур клублэн нырысетӥ сезоназ вормиз Ижкарысь «Валамон-Паримон» команда.

http://udmurt.media/udm/news/kultura/17739/

Поделитесь с друзьями:

Контентмейкер, мемолог и журналист

Дом Дружбы народов
Добавить комментарий