Шаркан ёросын удмурт лулчеберетлы сӥзем толэзь ортче

7-тӥ шуркынмонэ Шаркан черкогуртысь 4-тӥ номеро нылпи садын этнокультурной дышетсконлы сӥзем ёрос ӵошатскон ортчиз. Та ужрад туэ куинетӥ ползэ радъяськиз ини.

Вожвылъяськонэ мылысь-кыдысь пыриськизы 10 визьнодасьёс. Паймытӥз но шумпоттытӥз нылпи садын ужасьёслэн узыр опытсы. Мастер-классъёс тырмемын вал пуштросэн, аспӧртэмлыко быгатонлыкъёсын, творчествоен. Шӧдске, визьнодасьёс мылысь-кыдысь ужало шуыса. Сокем зол дасямын соослэн асьсэлэн амалъёссыя лэсьтэм дидактической материалъёссы, учкон пособиоссы, пиналъёслы люкон но возьматон арбериоссы. Валамон ини: ас коньдонзэс но ӧвӧл жалямын соос, ваньзэ сое дасяны!

Ужрад туж пайдаё луиз визьнодасьёс понна. Ӵошатсконэ пыриськись визьнодасьёслэн опытсы, тодон-валанзы йылӥз. Мастер-классъёсысь выль амалъёсты уже кутыны луоз школаосын ужасьёслы но. Таӵе визьнодасьёсын пиналъёс котьку но визьмоесь, чупыресэсь но азинлыкоесь луозы!