Шарканъёс «Быг-быг» фестивальлы дасяськыны кутскизы

«Туннэ нуналлы котькуд муниципал кылдытэтлы уж люкылэмын ини, — шуэ Удмурт лулчеберетъя «Быги» йӧскалык центрлэн кивалтӥсез Жанна Ермолаева. — Одӥгез эстонъёсты возьматоз, мукетыз поръёсты яке комиосты. Кызьы соос возьматозы бырйем калыклэсь азбарзэ, асьсэос малпаны кулэ. Со луыны быгатоз вурем дӥськут, пӧрам сиён-юон, кырӟан, эктон но мукет. Оло кин ке мукет улосысь фольклор коллективез но ӧтьыны быгатоз».

Таиз фестиваль семьялы сӥземын луоз. Семья кузпалъёсты гинэ уг огазея, со ӵош карыны быгатэ вань выжы калыкъёсты, — шуо фестивалез радъясьёс.

Туэ ужрад 6-тӥ пӧсьтолэзьысен кутскыса 3 нунал ӵоже кыстӥськоз. Нырысетӥ нуналаз арлыдоос шулдыръяськозы, ӵошатскозы, семинаръёсы пыриськозы. Кыкетӥез егитъёслы сӥземын луоз. Соос понна но пӧртэм площадкаос ужалозы.

Быгиос куное возьмало эшъёссэс — Эстониысь Обыницаысь кибашлыосты, Карелиысь Вокнаволок гуртын улӥсьёсты.

Ватсаса: Карелиысь Вокнаволок гурт туэ 4-тӥез финн-угор лулчеберетъя шоркар луиз.

www.myudm.ru/

 

 

Поделитесь с друзьями:

Контентмейкер, мемолог и журналист

Дом Дружбы народов
Добавить комментарий