Чорыген перепеч веръяны луоз фольклоръя но пӧраськонъя фестиваль-конкурс улсын Дэбес черкогуртын

Ужрадэ пыриськисьёс но куноос чорыген перепеч веръяны быгатозы. Перепечез сыӵе пушкесэн туж ӧжытэз пӧрало, шуэ Дэбес ёросысь лулчеберетъя но туризмъя «Сибирский тракт» центрысь сяме пыӵам лулчеберетъя но йӧскалык ужпумъёсъя ӧнерчи Галина Опарина:

«Дэбес палан, тодӥсь адямиос шуо, 30 пӧртэм перепеч пӧрало. Но ми со рецептъёсты рос-прос ӧм на ай гожъялэ. Туж тунсыко перепеч чорыген пӧрало та палан милям — Бадӟым Ӟӧтымын. Тамында улыса, ум но тодӥське вал чорыген но пӧрало шуыса. Собере малпаським — нош кыӵе перепечез ми ум на тодӥське? Со пумысь, отысен потӥз ни фестивальмы».

Фестиваль-вожвылъяськонэ пыриськозы сиён пӧрась предприятиос, нимаз ужбергатӥсьёс, пӧртэм огазеяськонъёс, пӧрасьёс, творчествоя коллективъёс, йӧскалык лулчеберетъя центръёслэн коллективъёссы но вань мылкыд карисьёс. Галина Опариналэн верамезъя, лыктозы Кез, Балезино, Красногорск ёросъёсысь куноос, озьы ик Ижысь куноосты возьмало.

«Фестивальын трос конкурсъёс, одӥгез соос пӧлысь гастрономической. Удмурт сиёнъёсты потто конкурсэ — кинлэн ческытгес, кинлэн чебергес. Жюри соосты эскере, собере лыктэм калык но эскере, аслэсьтыз куаразэ сётэ, «Дэбес марка» луэ. Котькуд поселение асьсэлэсь гуртсыя, кудзэ пӧраны быгато, кудзэ ӵемгес пӧралляло, сыӵе перепечьёсты потто. Дас поселение бере ёросын, дас пӧртэм перепеч поттыны быгатӥськомы одӥг нунал», — вераз «Сибирский тракт» центрысь ӧнерчи.

Озьы ик егит семьяос понна конкурс ортчыны чаклало, кызьы соос калыклэсь вашкала лулчеберетсэ утё но асьсэлэн семьяязы возё. 19 часысен егитъёслы этнодискотека но Дэбес ёрослэн дауркылъёсызъя «Кар ошмес» этноквест ортчозы.

Фестивальын мастер-классъёс, чеберлыко киужъёсын вузкарон-адӟытон ужалозы. Озьы ик ужрадэ Ижысь но Воткаысь байкеръёс пыриськозы.

«Калык культураез палэнэ соос уг кельто, соин ик соос милем туж кельшизы, фестивальлэн сценарияз но пыриськозы соос туэ», — вераз Опарина но шулдыръяськонын трос возьмамтэ кузьымъёс луозы шуыса пусйиз.

Озьы ик со фестивальлэн нимызъя валэктон сётӥз: «Со юри гинэ гожтэмын, вашкалазэ егитъёслы поттыны, кельтыны шуыса. «Ё» (йоу) шуо ук егитъёс — всё, пе, умой, всё, пе, окей шуыса. «Зарни ё» шуо. Милям перепечмы но зарниё, ческыт. Зар-Медлоын гинэ, удмурт лулчеберетъя центрын гинэ, пӧрало зарни пырыосын перепеч. Рецептсэс уг верало!»

http://udmurt.media/udm/news/kultura-i-turizm/23878/

 

Поделитесь с друзьями:

Контентмейкер, мемолог и журналист

Дом Дружбы народов
Добавить комментарий