Чеберайёсты бырйизы Удмуртиысь Глаз ёросын

Глаз ёрос луиз нырысетӥез, кытын нылкышно творчествоя «Чеберай» ӵектос ужзэ мытӥз. Ужрад форум бордысен кутскиз. Нылкышноосын стилист, блогер, ужбергатонъя тренер, психолог пумиськизы. Спикеръёсты кылзыны 100-лэсь трос адями люкаськиз.

“Стилья вераськон туж заинтересовать кариз учкисьёсты. Глазкарын таӵе темая ужрадъёс ичигес ортчыло.Со тунсыкогес луиз. Луиз тунсыко блогерство, малы ке шуоно Удмуртиын блогерство выжыятымтэ на-а, мар-а, шуод. Кӧня ке адями выре кадь блогер шуыса, но милям сыӵе валанмы ӧвӧл на. Вӧлмымтэ на”, – вера  «Чеберай» ӵектослэн Глаз ёросын кураторез, ёросысь лулчеберетъя но туризмъя центрысь калык сямъёсты но йӧскалык лулчеберетэз улӟытонъя валтӥсь методист Ольга Боталова.

Форум бере «Чеберай» элькун вожвылъяськонэ пыриськисьёсты быръён ортчиз. Отчы Глаз ёросысь 10 нылкышноос пыриськизы: быдэн куинь адямиен 18-35 аресъемъёс но 55 но мӧйыгесъёс пӧлын но ньыль кузя 35-55 аресъемъёс. Нылкышноос асэнызы тодматӥзы, визьсынанэ пыриськизы но кибашлы луэмзэс возьматӥзы.

Ольга Боталовалэн верамезъя, радъясьёслы секытгес йӧтӥз егит но мӧйы пыриськисьёсты шедьтыны.

“Кыкез нылашъёсмы вал «Тыло толэзь» вожвылъяськонысь. Мон соосты соку ик синйылтӥ. Удмурт кылэз тодо, валало. <…> Соос шумпотыса пыриськизы вожвылъяськонэ, одӥгез соос пӧлысь кастингез вормиз. <…> Котькуд гуртысь Глаз ёросысь мон тырши бырйыны, котькуд гурт мед пыриськоз – гурт но, кар но – шуыса”, – азьланьтэ  Ольга Боталова.

Ӵошатскон ортчон вискын Ladi Sveti (Светлана Ручкина) кырӟасьлэн 40 минутъем концертэз ортчиз. Ольга Боталовалэн кылъёсызъя, вал сыӵе учкисьёс но, кин юромо сое адӟон понна лыктӥз.

“Ми сое кылем арын «Тыло толэзь» ужрадэ ӧтчамы вал. Со Глаз ёрос понна выль ним вал, кудӥз туж кельшиз учкисьёслы. Тросэз учкисьёс юромо сое адӟыны лыктэмын ини вал”, –  Ольга Боталова.

Вожвылъяськонлэсь вань люкетъёссэ ортчыса, жюрилэн ёзчиосыз арлыдъя котькуд категориысь одӥг вормисез бырйизы. Озьы, «Чеберай» конкурслэн кыкетӥ люкетаз, интернет пыр куара сётонэ, куинь мурт потӥз: Екатерина Болтачева (Парзи черкогурт), Марина Наговицына (Штанигурт) но Галина Иванова (Глазкар).

«Чеберай» марафонлэн вуоноез ужрадэз 4-тӥ коньывуонэ Можгаын ортчоз.

https://udmurt.media/udm/news/kultura-i-turizm/65989/

 

Контентмейкер, мемолог и журналист

Дом Дружбы народов
Добавить комментарий