Финн-угор калыкъёслэн 7-тӥез дунневыл конгрессы ужаны кутскиз Финляндиысь Лахти карын

Конгрессын финн-угор калыкъёслэсь кылъёссэс но лулчеберетсэс утёнэн но азинтонэн, выжы калыкъёслэн но ӧжыт лыдъем калыкъёслэн эрикрадъёсынызы герӟаськем ужпумъёсты эскерозы.

Дунневыл форуме 170 делегатъёс, 300 чакласьёс но 50 журналистъёс вуизы. Соослы пумитан кылъёсын вазиськиз Россилэн азьмуртэз Владимир Путин.

«Таӵе конгрессъёс мерлык, экономика, гуманитари но демографи ӧръёсъя лэчыт ужпумъёс сярысь кенешыны умой луонлык сёто. Тазьы ӵошен ужан финн-угор калыкъёслэсь лулчеберетсэс но кылзэс утёнын бадӟым инты басьтэ. Оскисько, кенешонъёс дыръя кылдэм малпанъёс но кичӧлтонъёс улонэ пыӵалозы, калыкъёслэсь кусыпъёссэс паськытатыны, пӧртэм кунъёсын улӥсьёслэсь ог-огзэз валанзэс но осконзэс юнматыны юрттозы», — верамын Россиысь азьмуртлэн Кремльлэн сайтаз шараям телеграммаяз.

Конгресслэн ужанрадлыказ пленарной но нимаз ӧръёсъя кенешонъёс чакламын.

«Отын анай кылъёсты утён но азинтон ужпумъёсты ӝутозы. Озьы ик ивортодэтъя финн-угор дуннеен, экономикаен но инкуазен, демографиен, выль но вуж диаспораосын герӟаськем юанъёсты эскерозы. Валамон, котькуд калыклэн аслаз сюлмаськонъёсыз вань, куд-огез соос вань финн-угор калыкъёсын герӟаськемын. Кылсярысь, ӧжыт лыдъем калыкъёс понна лэчыт ужпум луэ мукет калыкъёсын сураськон», — верамын группалэн бамаз.

Удмурт элькунлэсь делегатъёс луыса Конгрессэ пырисько «Удмурт Кенеш» огазеяськонлэн ёзчиосыз Наталья Кондартьева (УдГУ-ысь Удмурт кылосбуръя, финноугроведениея но журналистикая институтлэн кивалтӥсез), Марина Ягуткина (Свердловск улосвылысь «Эгес» огазеяськонлэн кивалтӥсез) но Сергей Касаткин («Мынам Удмуртие» телерадиокомпаниысь валтӥсь редакторлэн воштӥсез). Со сяна, форуме мынэмын чакласьёс но журналистъёс.

ВАТСАН

Финн-угор калыкъёслэн дунневыл конгрессъёссы 4 арлы одӥг пол радъяськыло.

1-тӥез Конгресс ортчиз 1992-тӥ арын Сыктывкарын;

2-тӥез Конгресс ортчиз 1996-тӥ арын Будапештын (Венгрия);

3-тӥез Конгресс ортчиз 2000-тӥ арын Хельсинкиын (Финляндия);

4-тӥез Конгресс ортчиз 2004-тӥ арын Таллинын (Эстония);

5-тӥез Конгресс ортчиз 2008-тӥ арын Ханты-Мансийскын;

6-тӥез Конгресс ортчиз ӥ арын Шиофокын (Венгрия). 2012-т
Дом Дружбы народов
Добавить комментарий