Филармониын «Италмас» нылпи-студилэн концертэз ортчиз

«Италмас» школа-студиез кылдытӥз балетмейстер Леонора Мамонтова. 1992-тӥ арын отчы вуизы нырысетӥ дышетскисьёс — «Италмас» ансамбльлэн вуоно эктӥсь-кырӟасьёсыз. Али нылпиосты дышетэ егит балетмейстер Пётр Овчинников. Ас вакытаз со ачиз но та школаез горд дипломен йылпумъяз, дышетсконзэ азьланьтӥз Новосибирскын но Санкт-Петербургын.

— Школа-студие мон вуи кылем арын тулыспалэ. Отын 26 нылпи дышетске вал, — вера Пётр Владимирович. — Соос пӧлысь та дырлы кылизы 8-эз гинэ. Быръён пыр ортчыса, али дорам 100-лэсь уно покчи артитъёс дышетско. Пичиезлы 4 но ӝыны арес, бадӟымезлы — 15.

Концертын пӧртэм эктонъёсты возьматӥзы: бигер, удмурт, ӟуч, литва, эстон но мукет. Соос классической эктонлы матын.

— Милям программамы кылдытэмын Санкт-Петербургысь балетъя академилэн програмаез вылын, — вера Пётр Овичнников. — Нылпиос дышетско калык но классической эктонъёслы. Покчиосыз нылпиос арняяз 3 пол ке ветло, бадӟымъёсыз — нуналлы быдэ.

Покчи артистъёслэн анай-атайёссы школа-студилы тау каро: нылпиоссы тыбырзэс шонер возьыны дышизы, занятиосы шумпотыса ветло.

Школа-студиез йылпумъямзы бере артистъёс мыно пӧртэм ансамбльёсы — «Таноке», «Италмасэ» но мукетъёсаз.

http://udmdunne.ru/

Контентмейкер, мемолог и журналист

Дом Дружбы народов
Добавить комментарий