Урам театръёслэн усьтэм фестивальзы ортчоз Удмуртиын гудырикошконэ

Туэ «КапустаDay» фестиваль Россилэн азьмуртэныз кичӧлтэм Театрлэн арезлы сӥземын но «Театральное Приволжье» ӵектос улсын ортче.

Кӧня ке час ӵоже кыстӥськись ужрадэз сяме пыремъя ини Ижкарысь урамъёс кузя шествие усьтоз. Отчы пыриськисьёс азьвыл ик дасясько: костюмъёс малпало, лякыло, вуро – нылпиос азьдага (дракон) карисько, быдэ вуымтэос – пират шляпаос дӥсяло, нылкышноос аспӧртэм юбкаосын но дэремъёсын пото. Котьку сямен шествие азьын барабанэн шудӥсьёс ортчозы. Соос колонналы задор мылкыд сётозы.

Туэ фестиваль таӵе ӧръёсъя ортчоз:

  • урам театр;
  • импровизация театр;
  • кырӟан театр;
  • театр-перформанс;
  • ритмъя театр;
  • чеберлыко кылъя театр;
  • авторской театр;
  • урам театр луисьтэмгес театр.
Ужрадэз коммерци луисьтэм «Центр театрального искусства «Точкин дом» огазеяськон радъя. Туэ со «Театральное Приволжье» фестивале пыриське.

Фестиваль улсын «Точка» театр «Айно. Сердце Удмуртии» ӵектосэныз тодматоз, соин фестиваль мукетъёсызлэсь висъяськоз. Нош Сарапулэ «Лицедеи» театрысь артистъёс вуозы. Соос театре ветлӥсь егитъёслы мастер-классъёс ортчытозы, бӧрысь «Блю канари» тодмо номерзэс возьматозы.

Ватсалом, 23-28 куартолэзе Ижкарын Россиысь студентъёслэн но тунсыкъяськисьёслэн театръёссылэн фестиваль-конкурссылэн Приволжск федерал округъя улосвылкуспо люкетэз ортчоз. Фестивале округлэн вань улосвылъёсысьтыз 20 коллективъёс пыриськозы – 200 пала адями. Возьматонъёсты Москваысь но Ижкарысь театр удысысь ӧнерчиос, критикъёс чаклалозы.

https://udmurt.media/udm/news/kultura-i-turizm/59023/

 

Контентмейкер, мемолог и журналист

Дом Дружбы народов
Добавить комментарий