Удмурт эстрада кырӟанъя фестиваль ортчоз Кезын 19-тӥ оштолэзе

“Милям со фестивальмы ньылетӥзэ туэ ортчоз ини. Малпамы эстрадной кырӟанъя мед луоз шуыса. Со милям ёрос фестивальмы. Пыриськыны быгатозы нылпи садысь пиналъёсысен мӧйыозь”, –  Елена Селиверстова, Кезысь лулчеберетъя юртысь методикая ёзэтлэн кивалтӥсез.

Елена Селиверстовалэн кылъёсызъя, фестивальлэн ёрос инлыкез (статус) ке но, палэнысь куноослы соос туж шумпотозы.

Фестиваль выль удмурт эстрада кырӟанъёсты вӧлмытон но быгатонлыко выль адямиосты шараян понна ортчытӥське. Со арысь аре тросгес пыриськисьёсты люка.

Конкурсэ пыриськисьёслы удмурт кылын одӥг кырӟан быдэстоно луоз. Соосты солистъёс, дуэтъёс но ансамбльёс номинациосъя дунъялозы.

Ужрад 18 часын кутскоз, пырон дуныз 100 манет.

Тодэ вайытом, Удмуртиысь гурт лулчеберет ужъюртъёс но отын ужасьёс 2 миллион 700 сюрс манет тыр грантъёс басьтозы.

https://udmurt.media/udm/news/kultura-i-turizm/54357/

Контентмейкер, мемолог и журналист

Дом Дружбы народов
Добавить комментарий