Удмурт сиён-юонъёсын куноятӥзы Нижний Новгородын Калыкъёслэн огазеяськон нуналазы

“Ческыт но тазалыко сиён адямиосты огазея. Гастрономия пӧртэм калыкъёслэн аспӧртэмлыкенызы тодматскон понна пӧртэм интыосы вуылы мылкыд сётэ”, – вера Зарина Догузова, Туризмъя федерал агентстволэн кивалтӥсез.

«Гастрономическая карта России» федерал ӵектос улсын радъям фестивале 20 сюрслэсь трос адями вуылӥз. Асьсэ лулчеберетэнызы, сиён-юонъёсынызы тодматыны карелъёс, кержакъёс, осетинъёс, бигеръёс, бурятъёс, удмуртъёс но трос мукет выжы калыкъёс вуизы. Куноослы ыж сӥлен шурпа, сусыпумульыен щи, атаслэсь уха, табань, перепеч но мукетсэ ӵектӥзы.

Удмурт сиён-юонъёс огшоры но со дыре ик туж ческыт. Соин ик туристъёс соосты туж ярато но пӧртэм улосвылъёсын «Гастрономическая карта России» фестивальёсын шумпотыса сиё-юо, пусйиз Удмуртилэн тӧроез Александр Бречалов. Нижний Новгородын пӧсь гурысь поттэм пӧртэм пушкесэн перепечъёсты 2 сюрслэсь трос адями веръяз.

“Ростуризмлэн федерал ӵектосэныз Удмуртиысь гуръёс Россилэн лымшорысеныз музъем пумозь – Териберкаозь – ортчизы ни. Кылем арын Калыкъёслэн огазеяськон нуналазы Удмуртиысь команда Пятигорскын улосвылэнымы тодматӥз. <…> Оскисько, котькудӥз, кин удмурт сиён-юонъёсты веръяз, дорамы лыктыны мылкыд кароз – Брангуртысь песянайёс дорын кунояны, Лудорвайын перепеч пыжыны, Выль ар азьын Шараканын Тол Бабаен чай юыны”, – шуиз Александр Бречалов, Удмуртилэн тӧроез.

Нижний Новгородын фестиваль паськыт флэшмобен йылпумъяськиз. Пӧртэм улосвылъёсысь лыктэм пӧрасьёс асьсэ кылынызы, собере ӟуч кылын «Добро пожаловать!» но «Приятного аппетита!» шуизы.

Тодэ вайытом, 4-тӥ шуркынмонэ асьме элькунын Калыкъёслэсь огазеяськон нуналзэс сяна, Удмуртилэсь кунлык нуналзэ пусйизы. Кунлык басьтонлы 100 ар тырмон арез усьтон Глазкарын «Удмуртия огазея!» гражданско-патриотической возьматонэз 2 сюрс 500 адями учкиз.

https://udmurt.media/udm/news/kultura-i-turizm/69444/

Контентмейкер, мемолог и журналист

Дом Дружбы народов
Добавить комментарий