Удмурт нылкышноос дасясько укмысэтӥ Элькун конференцизылы

Нылкышно кенешчиос дэмлазы та бадӟым ӧтчамзэс коньывуон толэзе ортчытыны. 4 ар ӵоже ужамзылы йылпумъянъёс лэсьтэм сяна , Нылкышно кенешлэн кивалтӥсез Надежда Степанова удмурт нылкышно движенилэн азинскон сюресъёсызъя стратегия дасяны ӵектиз. Кыӵе луозы со азинскон сюресъёс, кыӵе валтись ӧръёсъя ужалозы удмурт нылкышноос –эскерозы конференциын .

Надежда Андреевна озьы ик пусйиз, Элькун Нылкышно ӧтчамлы дасяськон улсын ёросъёсын но пӧртэм ужрадъёс ортчыло. Кылсярысь, оштолэзе Вавож ёросысь Выль Бия гуртын «Гурт нылкышноос туала улонын» нимо ёроскуспо конференция радъяськиз. Вавож, Сюмси, Сьӧлта, Ува ёросъёсысь нылкышноос эскеризы анайлыклэсь данзэ ӝутон, семьяын анай кыллы гажан мылкыд пыӵатон, гурт нылпи садъёсын, школаосын удмурт кылэз дышетон номукет лэчыт ужпумъёсты.

Та вакытлы 10 ёросъёс бырйизы ини делегатъёссэс. Огъя укмысэтӥ Элькун нылкышно конференцилэн ужаз пыриськозы 150 пала нылкышно азьветлӥсьёс.

Дом Дружбы народов
Добавить комментарий