Удмурт литератураен но кырӟанъёсын тодматозы Москваын

Книгая калыккуспо адӟытон-вузкарон улсын Россиысь кун нылпи лыдӟетъюрт Москваысь удмуртъёслэсь бӧляксэс «Здравствуй, сосед!» ӵектосаз пыриськыны но Удмуртиен тодматыны ӧтиз.

Удмурт лулчеберетлы сӥзем ужрадын удмурт кыл, литература, сям-йылолъёс сярысь вералозы. Ужрад 19 часысен 20 часозь мыноз.

«Валтӥсь сцена вылын луозы удмурт рэперъёс Алексей Пикулев но Богдан Анфиногенов. Нылпиослы сцена вылын кык люкетлэсь программа луоз: нырысетӥяз Удмуртия сярысь верало — кытын со интыяськемын, кыӵе тодмо адямиос, каръёс отын вань. Йӧскалык дӥськутэн тодматомы. Чузъяськозы Удмуртия сярысь кылбуръёс, нылаш „Лымы тӧдьы“ кырӟанэз быдэстоз, мынам тодматонам пиналъёс но пыриськозы. Нош кутсконаз „Пипу куар“ кырӟан чузъяськоз», — вераз ужрадэз радъясь Марина Бородина.

Кыкетӥ люкетаз Дмитрий Корепанов удмурт дауркылъёсын, мадьверосъёсын тодматоз. Соку озьы ик чузъяськозы удмурт кырӟанъёс, кудъёссэ быдэстозы Удмуртиысь но Москваысь артистъёс Соос пӧлын Можгаысь Надежда Потапова, кунлэн шоркараз улӥсь Наталия Дзыга, Ирина Денисова, Олеся Полатова но Степан Лагунов.

http://udmurt.media/udm/news/kultura-i-turizm/24236/

Поделитесь с друзьями:

Контентмейкер, мемолог и журналист

Дом Дружбы народов
Добавить комментарий