Удмурт литератураез азинтон сюресъёс сярысь кенешизы Кун Кенешын

Люкаськонэз радъязы Удмурт Элькунысь Кун Кенешысь йӧскалык политикая, мер кышкыттэмлыкъя, регламентъя но ужез радъянъя ӧрилэн кивалтӥсез Энвиль Касимов но Историяя, кылъя но литературая удмурт институтлэн кивалтӥсез Алексей Загребин. Ужрадэ пырськизы Кун Кенешысь депутатъёс, иворчиос, мерлыко огазеяськонъёслэн ёзчиоссы, тодмо гожъяськисьёс, кылбурчиос, тодосчиос.

Удмурт поэзилэн азинтӥськон сюресъёсыз сярысь вераз Историяя, кылъя но литературая удмурт институтысь тодосчи Алексей Арзамазов. Солэн пусъемезъя, туала гожъяськисьёс ӵемгес гожъяськыны кутскизы кык кылын – удмурт но ӟуч. Валамон, ӟуч кылын гожтэм произведенилэн лыдӟисьёсыз арто, но соин ӵош ик тазьы гожъяськыса ышыны быгатэ удмурт кыллэн чеберлыкез, вашкала фразеологической кылсочетаниос. Алексей Арзамазов пусйиз удмурт кыллэсь чеберлыксэ но узырлыксэ утёнлэсь кулэлыксэ.

Удмурт кун унверситетысь профессор Марина Серова ӟуч н удмурт гожъяськисьёслэн кусыпъёссы сярысь вераз. «Ӟуч кылбурчиос уг тодо удмурт кылбурчиосты, удмурт кылбурчиос уг тодо ӟучъёсты». Калыкъёс ог-огенызы тунсыкъяськемысь дугдэмын. Калыкъёсты огазеян бордын мургес ужаны ӧтиз тодосчи.

Удмуртиысь журналистъёслэн огазеяськонзылэн кивалтӥсез Пётр Захаров ӝутӥз егит гожъяськисьёс сярысь юанэз. Солэн малпамезъя, литератураез ӵапак егитъёс кылдыто, соин ик соолы нимысьтыз саклык висъяно.

Дом Дружбы народов
Добавить комментарий