Удмурт кылэн тодматӥзы Великий Новгородын кылъёсъя V фестивальын

«Фестиваль туж умой ортчиз, туж трос кылъёсын тодматэмын вал: горномарийской, чуваш, каталанской, тибет, фин, Австралиысь аборигенъёслэн кылъёсынызы, отын 35 пӧртэм кылъёссы. Мон верай удмурт кыл сярысь. Нырысь ик валэктӥ, кытын со Удмуртия, малы ке шуоно тросэз уг тодо, мынэсьтым куд-ог дыръя «Со Сибирьын-а?» шуыса юало. Собере ӟечкылан сярысь, алфавит, выль букваос, личной местоимениос, ударение, агглютинативность, отрицательной глаголъёс, послелог, удмурт числительнойёс сярысь верай. Собере Герберен, перепечъёсын, Брангурт песянайёсын, Чайковскиен тодматӥ», — вераз Богдан Владыкин.

18 аресъем Богдан та дыре Санкт-Петербургысь А. С. Пушкин нимо Ленинград кун университетын география но биология ӧнеръёсъя дышетске. Со вакытэ ик Санкт-Петербургысь но Ленинград улосвылысь «Удмурт Кенеш» огазеяськонлэн кивалтӥсезлэн воштӥсез луэ, мылкыд карисьёсты удмурт кыллы дышетэ. Солэн верамезъя, группаязы тямыс адями ветлэ.

«Удмурт Кенешамы» удмурт кылэз тодӥсьтэм муртъёс вань, нош соос удмуртъёслэсь тунсыкъёссэс азинто бере, соос тодыны кулэ удмурт кылэз. Огезлэн яратоно нылашез Удмуртиысь, но со удмурт кылэз уг тоды, пе. Пияшезлэн тодэмез потэм. Куд-огъёсызлы кыл кельше. Мон соосты 1–4 классъёслы чаклам «Анай кыл» учебникъя дышетӥсько. Секыт сётӥське «ӥ» букваез пуктон, «сь» сочетаниез «щ» шуыса лыдӟон, «ӧ» буква», — валэктэ Богдан Владыкин.

Паймымон, но Богданлэн анаез Украинаысь.

«Мынам атае удмурт. Кылэз школаын дышетӥ, дышетӥсе Ершова Марина Александровна вал, али со Дэбесын «Удмурт Кенешлэн» ёзэтэныз но кивалтэ. Туж трос песянаен улӥмы, соин али но нуналлы быдэ удмурт кылын гинэ вераськисько», — шуэ Богдан Владыкин. 

Дом Дружбы народов
Добавить комментарий