Удмурт кылэн герӟаськем вакчи шудон фильм кылдытыны малпанъёслы вожвылъяськон ялӥзы Удмуртиын

Кинорежиссёр, сценарист, «Киноглаз-ов» удмурт студилэн но ВЕТР киношколалэн кивалтӥсез Вениамин Тронин нимысьтыз пусйиз, вожвылъяськон улсын дась сценарийёсты уг возьмало, ӵапак малпанъёсты гинэ.

“Адямиос литература куронъёсъя гожтыны тыршо, туж чеберлыко, туж грамотно. Зэмзэ вераса, ваньмыз со кулэ ӧвӧл. Валтӥсез – улонысь кыӵе ке учырез возьматыны. Туж огшоры кылъёсын. <…> Киноын действие кулэ, мар отын луиз, нош мар мон отын малпай, соиз ини литература удыс”, – вера Вениамин Тронин.

Вениамин Тронилэн кылъёсызъя, кулэ кыӵе ке огшоры, тамаша учыръёс, кудзэ адямиос ог-огзылы ӝӧк сьӧрын верало. Но со учыр кызьы ке удмурт кылэн герӟаськемын мед луоз. Шуом, кызьы удмурт кыл адямилы кыӵе ке учырын юрттӥз. Яке удмурт кылэз тодымтэеныз сэрен мар ке пусйымонэз палэнтӥ кошкиз. Со сярысь кӧня ке предложениен гинэ гожтыны кулэ.

Вениамин Тронинлэн верамезъя, вожвылъяськонлы дурбасьтӥзы Удмуртиысь лулчеберетъя министерство но элькунысь йӧскалык политикая министерство. Озьы ик Йӧскалык театр юрттыны дась.

Фильм кылдытыны малпанъёсты veniamin2003@mail.ru электрон адресъя келяно, ватсаса юанъёсты Вениамин Тронинлы 8 (963)-549-01-77 телефон номеръя сётыны луоз.

https://udmurt.media/udm/news/obshchestvo/67451/

Контентмейкер, мемолог и журналист

Дом Дружбы народов
Добавить комментарий