Удмурт кылын «Маугли» мультфильмез адӟыны луоз матысь дыре интернет вотэсысь

«Шедиз со «Avito»-ысь. Мон утчасько вал, дышем сямен ини, «удмуртский язык» кылъёсъя поискысь мае ке но, мар шедёз шуыса. И сюриз ялон киноплёнкаосын. Сое усьтыса, адӟи, отын пӧртэм плёнкаос пӧлын вань «Маугли» и капслокен гожтэмын «ВНИМАНИЕ: УДМУРТСКИЙ ЯЗЫК!!!», – вера Богдан Анфиногенов, Удмуртиысь Калыкъёслэн эшъяськон юртысьтызы методист.

Со совето вакытэ удмурт кылэ берыктэм мультфильмен плёнка шуыса валаса, Богдан Анфиногенов ялонэз интыям муртэн герӟаськем но оцифровка лэсьтон пумысен вераськем. Тунсыко, но со адямилы удмурт кылын плёнкаез кужмысь сямен донгиллям, солы ӟучьёсыз гинэ кулэ вылэм.

Богдан Анфиногеновлэн кылъёсызъя, удмурт кылэ берыктэм фильмъёслэсь али кытын возиськемзэс но тодыны уг луы, нош совето вакытэ удмурт кылэ 200-лэсь трос ужъёс берыктэмын вал. Кылсярысь, «Любовь и голуби» фильм. Ваньзэ сое удмурт театрысь артистъёсын ӧнерлыко тӥрлык вылын гожтӥзы. Ужез быдэстон понна трос коньдон висъязы.

Мультфильмез оцифровать карон понна 3 сюрс манет кулэ вал. Соку Богдан Анфиногенов «ВКонтакте» мерлыко вотэсысь бамаз коньдон бичан пумысен вазиськон гожтӥз, но со нуналэ ик Александр Ожмеков нимо воргорон вань кулэ коньдонэз келяз. Со сяна но трос гинэ мукет юаськисьёс, юрттыны дась луисьёс вал.

«Вазиськеме потэ вань адямиослы, кинлэн, оло, вань кыӵе ке тунсыко видеофайлъёссы удмурт кылын: ивортэ, поттэлэ вал соосты интернетэ, угось со туж дуно материалъёс, адямиос шумпотозы гинэ, удмурт кылын тросгес мед таӵе материалъёс луозы!», – вера Богдан Анфиногенов.

Богдан Анфиногеновлэн верамезъя, цифра амалэ выжтэм мультфильм коньывуонэ дась луыны кулэ ини. Бӧрысь со сое интернет вотэсэ поттоз но, вань мылкыд карисьёс «Маугли» мультфильмез удмурт кылын  адӟыны быгатозы.

https://udmurt.media/udm/news/kultura-i-turizm/66437/

Контентмейкер, мемолог и журналист

Дом Дружбы народов
Добавить комментарий