Удмурт кылын бард кырӟанъя «ТылоБурдо» фестиваль ортчоз Пичи Пургаын

«Та ужрадын пото выль нимъёс. Ми тодӥськом асьмелэсь гожъясьёсмес, тодмо крезьгурчиосты. Нош копак выль нимъёс вордско та ужрадын. Малы со ортчытӥське Тыло гуртын? Со милям тодмо гожъясьёсмылэн вордскем шаерзы. Отысь потэмын тодмо агай-вынъёс Самсоновъёс. Озьы ик ми сое герӟаськомы эшшо одӥг композиторен-бардэн, кудӥз нырысьсэ, дыр, сыӵе кырӟанъёс гожъяны кутскиз (удмурт кылын — ред.), со — Владимир Возняков. Шумпотӥськом, со котьку пыриське фестивале, пыриське жюрие. Соку но (2015-тӥ арын — ред.) жюриын вал, али но жюриын луоз. Туж сыӵе профессионально быгатэ дунъяны кырӟасьёсты», – пусйиз Людмила Шумилова.

Та дыре вожвылъяськонэ пыриськыны мылкыд карисьёслэсь 10 пала куриськонъёс вуизы ни.

«Кӧня ке но стереотипез но турттӥськом сӧрыны. Тросэз бард кырӟанэз гитараенгес герӟало. Ми шуиськом, татын валтӥсез курон — крезьгурез но кылъёсыз луыны кулэ авторлэн. Нош кыӵе инструментэн со, инструменттэк-а со сое кырӟалоз-возьматоз — соиз аслаз ужез ини», – вера Людмила Шумилова.

Удмурт кылын бард кырӟанъя фестивалез радъясьёс кырӟасьёслы дуно кузьымъёс дасязы. Нырысетӥ инты понна 5 сюрс манетлы сертификат но студиын кырӟанэз дунтэк гожтыны луонлык сётозы. Со сяна, таяз арын ньыль номинация кылдӥз:

  1. «Зрительская симпатия», учкисьёс куара сётонэн быръёзы.
  2. «Надежда Фестиваля», пинал кырӟасьёс пӧлын.
  3. «За верность жанру», тодмо авторъёс пӧлын.
  4. «Неформат», мукет кылын кырӟан понна.

Номинантъёслы 1 сюрс манетлы сертификат но тодмо суредасьлэсь, Зоя Лебедевалэсь, нимысьтыз синпель кузьмалозы.

Вожвылъяськон программа сяна, фестиваль улсын мастер-классъёс ортчытозы, тыл вылын пӧсьтэм ӝукен но пыжем картофкаен утялтозы.

«ТылоБурдо» фестивале пыриськыны мылкыд карисьёслэсь куронъёссэс 20-тӥ куарусёнозь возьмало Пичи Пурга ёрос лыдӟетъюртын яке 8 (34138) 4-24-39 телефон пыр.

Тодэ вайытом, удмурт кылын бард кырӟанъя нырысетӥез «ТылоБурдо» фестиваль 2015-тӥ арын ортчиз . Соку вожвылъяськонэ быдэс ёросысь но Огырчиысь 8 кырӟасьёс люкаськизы. Та ӵектосэз быдэстон понна Пичи Пурга ёрос лыдӟиськонни Йӧскалык политикая министерстволэн ӵектосаз пыриськыса коньдон басьтӥз. Туэ фестивалез ортчытон понна спонсоръёсты шедьтӥзы.

http://udmurt.media/udm/news/kultura-i-turizm/24554/

Контентмейкер, мемолог и журналист

Дом Дружбы народов
Добавить комментарий