Удмурт кылъя курсъёс ужаны кутскизы Казаньын

Курсъёсты нуись, Татарстанысь Удмурт автономилэн быдэсъясь кивалтӥсез Марина Ивановалэн кылъёсызъя, кылем арын тросгес удмуртъёс, удмурт кылэз тодӥсь, гажась, но кема дыр ӵоже вераськымтэ муртъёс пыриськизы вал. Нош туэ югдур мукет. Удмурт кылэз дышетыны арнянунал школае ньыль нылпиос но курсъёсы – ньыль мӧйыос ветло. Пиналъёс удмуртъёс ик ке, мӧйыос – ӧвӧл.

“Соос пӧртэм калыкъёс, соос бигеръёс ваньмыз, соос мылкыд кариськизы удмурт кылын вераськыны, валаны ог-огзэс, соос мыло-кыдоесь, соослы тунсыко Поволжьеысь калыкъёслэн, бускельёслэн лулчеберетсы”, – шуэ Марина Иванова.

Эшшо ик соослы тунсыко потэ удмуртъёслэн, поръёслэн но мукетъёсызлэн бигер кылэз тодэмзы.

“Со сыӵе адямиос, кудъёсызлы тунсыко, кызьы тани ми, удмурт калык, пор калык бигер кылэз тодӥськом. Нош малы милемлы дышетонтэм – соос вот сыӵе мылкыдын вуизы”, – азьланьтэ  Марина Иванова.

Курсъёс оглом кык толэзь ӵоже кыстӥськозы, пумиськонъёссы арняяз кык пол луылозы. Дышетӥсьлэн кылъёсызъя, соос мур тодон-валанъёс басьтон бордын уз тырше, ог-огзэс валаны, куспазы вераськыны дышетскозы.

“Мон кылэз нуллӥсь, монэ озьы гинэ лыдэ басьтоно, но ватсаса тодон-валан сётӥсь дышетӥсез сямен. Кутскон сётыны мон быгатӥсько, но мур тодон-валан сётыны уг. Малы ке шуоно мон удмурт кылэз 3-тӥ классозь гинэ дышетэмын. Ваньмыз, мае мон тодӥсько, кызьы мон вераськисько, со ваньмыз улонъя, удмуртъёсын герӟаськем бере, соосын ужаны кутскем бере”, –  Марина Иванова.

Ужазы пӧртэм учебникъёсты, словарьёсты кутозы. Кылсярысь, «Мар лэся» учебникез, ӟуч-бигер-удмурт словарез, разговорникез.

https://udmurt.media/udm/news/obrazovanie-i-nauka/65579/

Контентмейкер, мемолог и журналист

Дом Дружбы народов
Добавить комментарий