Удмурт кылъя дунтэк курсъёс 1-тӥ коньывуонэ кутскозы

«Али вазиськисьёс трос ини. Арысь аре курсъёсы ветлӥсьёс егитомо. Азьло тросгес вал пенсие потэмъёс — кинлэн дырыз вань. Нош али егитгес калык лыктэ ини. Семьяен но лыкто. Шедьто асьсэлэсь интызэс татын сетевой маркетинген ужасьёс, страховой агентъёс, егит анайёс-атайёс лыкто, нылпизэс дышетэмзы потэ», — вераз одӥгез курсъёсты радъясез, анай кылъя дышетӥсьёслэн «Выжы» огазеяськонзылэн кивалтӥсез Ангелина Решетникова.

Анай кылэз дышетонъя курсъёс радъясько элькунмылэн шоркараз но мукет ёросъёсын. Отчы ветлыны быгато удмурт кылэз валась но, тодӥсьтэм но муртъёс. Котькуд дышетӥсь аслыз пайдалыкогес ужан амал быръе: одӥгез рольёсъя шудон пыр, мукетыз театръёсы ветлыса, куинетӥез доска вылэ мелэн гожъяса удмурт кылэз дышетскисьёсызлы валэктэ.

«Дышетӥсьёс милям туж тыршыса ужало, ӝытъёсы соос ужало. Куд-огезлэн пичи нылпиоссы ке но вань, ужало», — шуэ Ангелина Решетникова.

Пусъём, удмурт кылэз дышетонъя курсъёс нырысьсэ ӧвӧл ни. 2017-тӥ арлэн нырысетӥ семестраз, кылсярысь, Удмуртиын 18 группае 300 пала мылкыд карисьёс люкаськизы. Котькудӥзлэн удмурт кылэз тодон мугез аслаз: кинлы ке ужбергатонзэ азинтыны кулэ, кин ке песянайзэ шумпоттон понна дышетске, кин ке но аслаз улосвылаз таӵе ик курсъёс усьтон понна ветлэ.

Умойгес но шаплыгес тодон-валан сётон понна дышетӥсьёс асьсэос но выль амалъёсын тодматско.

«Гужем ми пыриськимы „Яратоно удмурт кыл“ фестивале, отын шедьтӥмы ми кадь ик малпаськись муртъёсты. Милям отын радъямын вал вераськон инты (коммуникативной площадка). Со милемлы туж-туж вал пайдаё. Ми сое радъямы дышетӥсьёс командаен, сыӵе туала амалэн, огшоры пуксьыса ми ӧм улэ. Ми тодматским кыл дышетонъя принципъёсын, кудъёсыз кутӥсько Москваын но, Эстониын но», — пусйиз Ангелина Решетникова.

Та вакытэ тодмо ӧвӧл на, кытын ортчозы удмурт кылъя дунтэк курсъёс. Со сярысь ивор матысь дыре ужрадлэн ВКонтакте группаяз потоз. Отысь ик шедьтыны луоз гожтӥськон понна телефон номеръёсты.

http://udmurt.media/udm/news/obrazovanie-i-nauka/24526/

Поделитесь с друзьями:

Контентмейкер, мемолог и журналист

Дом Дружбы народов
Добавить комментарий