Удмурт кыллэсь нуналзэ пусъёзы Россиын, Венгриын, Словакиын

“Та дыре удмурт кыл понна валтӥсез – солэсь интызэ калыкын юнматон, солэсь кутӥськемзэ паськытатон, элькунлэн кун кылэзлэсь сямен инлыксэ быдэстон”, –  Артём Малых, МУШ группаысь азьветлӥсь.

Ужрадъёс 20-тӥ шуркынмонэ ик кутскизы ини. Кылчи но кык кыло нылпилэн анаез Юлия Спешилова кыккылолыкъем пиналъёсты будэтон сярысь онлайн-семинар ортчытоз. Докладэз удмурт кылын луоз. Семинаез радъясь – Финн-угор егитъёслэн ассоциацизы (МАФУН).

Ижкарын удмурт кылъя курсъёсты радъясьёс туспуктэмъёсъя вожвылъяськон ялӥзы: пыриськисьёс Удмуртиысь каръёсысь но ёросъёсысь мер интыосын удмурт кылын гожтэмъёсты туспуктыны но нимысьтыз хештегъёсын (#деньудмуртскогоязыка #удмурткыллэннуналыз #укн) мерлыко вотэсъёсы поттыны дэмлало. Озьы адӟиськоз, кызьы кутӥське улосвыламы удмурт кыл.

Удмурт кыллэсь нуналзэ пусъён борды нырысьсэ итӥське Словакия. 25-тӥ шуркынмонэ Нитра карысь университетысь удмурт студентъёс куноослы удмурт кылъя экспресс-курс ортчытозы, удмурт кырӟанъёслы но эктонъёслы дышетозы, Удмуртия сярысь вералозы.

26-тӥ шуркынмонэ «Кенеш» журнал «Туала удмурт литература: шедьтонъёс но ыштонъёс» котырес ӝӧк ортчытоз.

Егитъёслэн «Шунды» огазеяськонзы Йӧскалык политикая министерствоен но Ижкарысь Калыкъёслэн эшъяськон юртэнызы валче удмурт кылъя тодматскон урокъёс радъялозы.

Венгриысь Сегед университетысь финн-угор кылтодонъя кафедраын Удмурт кыллэн нуналэзлы сӥзем ӝыт ортчоз. Венгриысь кылчиос но удмуртъёс Ашальчи Окилэсь кылбуръёссэ лыдӟозы но сэрттозы-пертчозы, со сярысь документальной фильм учкозы но кырӟалозы-эктозы.

27-тӥ шуркынмонэ «Лудорвай» музейлэн Ижкарысь выль залаз «Юмок» театр студия «Алнаш зомби» пьесаез лыдӟон ортчытоз.

Москваысь ужрадын Литературая Горький нимо институтысь доцент Вера Пантелеева 20-тӥ даурысь удмурт литературалэн сюресэз сярысь вералоз. Озьы ик ужрадын удмурт кылбуръёсты лыдӟозы. Куноосты палэзьлэсь но шулэсь удмурт коктейльёсын куноятозы.

Глазкарысь дышетӥсьёсты дасянъя институтын педагогика тодосъя кандидатлэн Ольга Никифововалэн «Зарождение и становление удмуртской драматургии» лекциез ортчоз.

Сарапулын «Электрон» лулчеберет дворецын удмурт кыл сярысь эссеосъя конкурс, удмурт литературая викторина ортчозы, люкаськемъёсты «Вуюись» фольклор ансамбль шулдыртоз.

Удмурт кыллэсь нуналзэ нырысьсэ 2018-тӥ арын пусйизы. Солэн кулэлыкез сярысь Алабгоын Удмуртъёслэн I ӧтчамзылы 100 ар тырмонлы сӥзем улосвылкуспо конференциын вераськизы. 27-тӥ шуркынмонэз МУШ группаысь удмурт азьветлӥсьёс ӵектӥзы, ӵапак та нуналэ 2001-тӥ арын «Удмурт Элькунысь кун кылъёс но Удмурт Элькунын улӥсь мукет калыкъёслэн кылъёссы сярысь» кат юнматэмын. Соя удмурт кыл Удмуртиын кун кыл инлык басьтӥз. Нуналэз пусъён удмурт кылэз, со сярысь тодон-валанэз вӧлмытон но кулэлыксэ юнматон понна чакламын.

Контентмейкер, мемолог и журналист

Дом Дружбы народов
Добавить комментарий