Дом Дружбы народов /
  • Иворъёс
  • «Удмурт кенеш» огазеяськонлэн исполкомез люкаськылӥз
  • «Удмурт кенеш» огазеяськонлэн исполкомез люкаськылӥз

    7 июня 2018 г.


    Туннэ «Удмурт кенеш» огазеяськонлэн исполкомез люкаськылӥз. Отын та дырлы тужгес но валтӥсь ужпумъёс сэрттэмын-пертчемын. Нырысь ик вераськон мынӥз элькун Герберез ортчытон пумысен.

    Шулдыръяськон туэ Ува ёросысь Пекшур гурт вӧзын 16-тӥ инвожое радъяське. Возьмало 10 сюрс котыр куноосты. Соос Удмуртиысь сяна, Россилэн портэм улосъёсысьтыз вуыны кулэ. Азьвыл аръёсы сямен ик ужалозы пӧртэм площадкаос: «Эктон луд», «Усточикар», «Шудон азбар». Нош муниципал кылдытэтъёслэн тӧрооссы веник керттыны быгатэмзэс возьматозы. Программа туннэ дась ни. Соин тодматскыны луэ Эшъяськон юртлэн интернет бамаз.

    Пумиськонын озьы ик нимысьтыз саклык висъямын вал «Удмурт кенешлэн» Президент грант утыны быгатэм ӵектосэзлы. Со калык эктонъёсъя «Чебеляй» студилэн калыккуспо «Мост» лагерез.

    «Чебеляй» студия понна «Мост» фестиваль 15-тӥез лэ. Ӵектос улсын трос ужрадъёс чакламын: Ижысь тымет дорын бадӟым эктон площадка радъян, экспедициос бӧрсьы калык эктонъёсын видеоучебник поттон.

    Мукет проектъя — «Чипчирган» удмурт интернет радио кылдытон пумысен — мылкыдзэ вераз Удмуртиысь журналистъёслэн огазеяськонэнызы кивалтӥсь Елена Капитоненко. Исполкомын малпан умоен лыдъямын вал. Радио проектэн журналистъёслэн огазеяськонзы озьы ик Президент грантъёсын фондэ вазиськыны чакла. Ватсалом на, нырысетӥез удмурт интернет радио ужаны кутскиз ог 5 ар талэсь азьло «Мынам Удмуртие» телерадиокомпанилэн вотэсбамаз.

    http://www.myudm.ru/