Удмурт калыклэн мифъёсыныз но мадьверосъёсыныз книга Россиысь устоосыз книгаос пӧлы шедиз

Книгае пырем мифъёсты но мадьверосъёсты люказ но ӟуч кылэ берыктӥз кылосбур тодосъя кандидат Надежда Кралина. Иллюстрациосты дасяз Удмуртиысь калык суредась Вячеслав Михайлов. Книгапоттоннилэн кивалтӥсезлэн Юрий Кузнецовлэн верамезъя, солэн быдэс творчествоез та книгае пыриз, одӥгез но суред та бичетлы шуыса нимысьтыз лэсьтэмын ӧвӧл.

«Нимысьтыз пусйысал дизайнермылэсь ужзэ — со егит пияш Валентин Семёнов – вера Юрий Кузнецов. – Нырысь ик ми та книгаез лэзим солэсь, дизайнерлэсь, ужзэ синйылтон понна. Асьтэос валаськоды, татын текстъёсыз нокыӵе оригинальной ӧвӧл, соос калыклы тодмо. Бадӟым чебер форматэн со книга, кие кутымон. Со сяна, со чибориё, туала нуналлы тупась-а, мар-а шуод»

«Арлэн устоосыз книгаосыз» 26-тӥ конкурслэсь лауреатъёссэ но дипломантъёссэ ялон но пусъён ужрад 2017-тӥ арын 5-тӥ инвожое «Красная площадь» книга фестиваль улсын ортчоз. Соку тодмо луоз, кыӵе ним басьтоз Удмуртиысь книга — лауреат яке дипломант.

Россиысь книга поттӥсьёслэн ассоциацизы Печатья федерал агентствоен ӵош «Россиысь устоосыз книгаос» вожвылъяськонэз арлы быдэ ортчытэ. Берло дыре йылпумъянъёсты шараяло «Красная площадь» фестивальын.

Тодэ вайытом, со ужрадын ик Россиысь калыкъёслэн кылбуретсылы сӥзем книгаен тодматон луоз. Бичетэ 5 удмурт кылбурчиослэн ужъёссы шедизы.

Ватсалом, «Удмуртия» издательство Россиысь Печатья агентстволэн «Малая Родина» конкурсаз но книгаоссэ келяз — «Я живу в Удмуртии», «Сарапул. Жемчужина Камского берега», «П. Чайковский. Родина гения». Юрий Кузнецовлэн верамезъя, соос но туж пусйымонэсь, кие кутымон книгаос, соин ик оске «книгаосмы асьсэ интызэс шедьтозы Россиысь книгаос радын но» шуыса.

http://udmurt.media/udm/news/kultura-i-turizm/19916/

Контентмейкер, мемолог и журналист

Дом Дружбы народов
Добавить комментарий