Удмурт арня Сарапул карын

Со усьтӥськиз «Шундэктон» программаен, ивортэ «Удмуртия» агентство. Удмурт егитъёслэн «Шунды» огазеяськонзылэн Ижкарысь ёзчиосыз кырӟанъёс быдэстӥзы, удмурт шудонъёс, этнодискотека ортчытӥзы.

«Тросэз люкаськемъёс удмурт кылэз уг тодо, но таӵе ужрадъёсын соослэн удмурт калыклэн лулчеберетэз сярысь тросгес тодыны луонлыксы вань», — пусйиз «Удмурт Кенеш» огазеяськонлэн вице-президентэз Алексей Серебренников.

Со нуналэ ик Сарапулын «Удмурт дӥськут. Вашкалаез но туннэез» адӟытон усьтӥськиз. Солэн бадӟым люкетэз сюан дӥськутлы сӥземын.

Удмурт лулчеберетъя арнялэн кыкетӥ нуналаз мерлыко огазеяськонъёслэн азьветлӥсьёссы 42 номеро нылпи садэ вуылӥзы. Удмурт кырӟанъя «Вуюись» ансамбльысь артистъёс удмурт гуръёсты быдэстӥзы, покчиослы удмурт кылъёсты валэктӥзы, нылкышноослэн чеберъяськон арбериосынызы тодматӥзы. Таиз тужгес но кельшиз пичи нылъёслы, соос чыртывесь, угы, йыркерттэт, поскес кылъёсты дышетӥзы. Озьы ик пиналъёс мыло-кыдо пыриськизы «Капка ултӥ пыран-потан» шудонэ.

Со дыре ик лыдӟиськонниосын ужасьёс «Лӧпшо Педунь дорын куноын» праздник ортчытӥзы. Пиналъёсты перепеч пыжыны дышетӥзы.

Литературая но крезьгуръя «Та кылбуръёсы — тюрагайёсы» ӝыт ортчиз Сарапулысь машинаос лэсьтонъя но иворъёсты вӧлмытон технологиосъя техникумын. Со сӥземын вал удмурт кылбурчиослы — Кузебай Гердлы, Ашальчи Окилы, Флор Васильевлы но Эрик Батуевлы. Ужрадэ пыриськизы «Шунды» но «Удмурт Кенеш» огазеяськонъёслэн Сарапулысь ёзэтъёссылэн азьветлӥсьёссы, удмурт кырӟанъя «Вуюись» ансамбль, техникумын дышетскисьёс. Пумиськонын кылбурчиослэн улон но творчество сюресэнызы тодматӥзы, кылбуръёссэс лыдӟизы.

Котькуд кылбурчилэн творчествоез аспӧртэм. Кузебай Герд аслаз кылбуръёсаз удмурт калыкез «сайканы», дышетскыны но улон ӧре мыло-кыдо пыриськыны ӝутказ. Ашальчи Оки удмурт нылкышноослэсь улон-вылонзэс возьматӥз. Флор Васильев улонэз, вордскем музъемез но ас калыктэ яратыны мылкыд сётылӥз. Эрик Батуев, «пӧсь интыосын» ужам журналист, кылбуръёсаз ожгар темаез усьтэ. Калыкъёсты выжызыя люкытэк, со гожтӥз: «Тон сьӧд, мон тӧдьы, вирмы гинэ одӥг кадь — горд».

Студентъёс туж тунсыкъяськыса кылзӥзы удмурт кырӟанъёсты, кылбуръёсты. Со егитъёслы удмурт калыклэн лулчеберетъя йылолъёсыз шоры валаса учкыны юрттоз.

Дом Дружбы народов
Добавить комментарий