Удмуртиысь лымшор ёросъёсысь дышетскисьёс понна ӵектосъёсъя «ВУКО» школалэн семинарез ортчиз Пичи Пургаын

Мерлыко ужпумъёсъя ӵектосъёсты кылдытон амалъёслы дышетскон понна ужрадэ Удмуртилэн лымшор ёросъёсысьтыз 50-лэсь ятыр дышетскисьёс люкаськизы.

Ӵектосъёсъя «ВУКО» школа – «Проектный офис удмуртских школьников» ӵектослэн люкетэз. Со Удмуртиысь Кузебай Герд нимо йӧскалык гимназия юрттэм улсын Егитъёсын ужанъя федерал агентстволэсь (Росмолодёжь) утэм грант чотын улонэ пыӵатӥське.
Интерактивной сессия но ужъя шудон форматъёсын ортчем семинар улсын дышетскисьёс 14 ӵектосъёсъя малпанъёссэс шараязы. Котькуд малпанэнызы соос ог-огзэс тодматӥзы. Пиналъёс асьсэос ик тужгес умой дасямъёссэ но тунсыкооссэ бырйизы, соос пӧлын: удмурт кылэз влогъёс но мемъёс пыр азинтон, школаосын медиа-центръёс кылдытон, туала ӧнеръёслы дышетон, тазалыксыя ӧжыт быгатонлыко но секыт югдуре сюрем нылпиосын кусыпъёс юнматон, Быдӟым Атыкай ожысь нылпиос, soft skills быгатонлыкъёсты азинтон.

“Али та школаын мерлыко ӵектосъёс кылдытонын нырысетӥ вамыш гинэ ай, но ӵапак татын нылпиослэсь тунсыксэс но котыр улон шоры кылкутыса учконзэс сайкатыны, соослэн тыршемзылэсь но мыло-кыдо луэмзылэсь гуртъёсмылэн, ёросъёсмылэн, каръёсмылэн, элькунмылэн, кунмылэн туннэез но азьланез кылдэ шуыса возьматыны кулэ”, – вера  Юлия Шахтина, ӵектослэн кивалтӥсез но тренерез.

Ужрадлы йылпумъянъёсъя тужгес мыло-кыдо дышетскисьёсты ӵектосъёссэс йылаз-пумаз вуттыны Ӵектосъёсъя элькун интенсиве ӧтизы. Со Ижкарын шуркынмонэ ортчоз.

«ВУКО» школалэн вуоно семинарез элькунысь шор ёросъёсысь пиналъёс понна Шаркан черкогуртын ортчоз.

Контентмейкер, мемолог и журналист

Дом Дружбы народов
Добавить комментарий