Удмуртиысь кык ӵектосъёс «Культурная мозаика малых городов и сёл» Росси конкурсын вормисьёс пӧлы шедизы

Вожвылъяськонын утэм коньдонэн Сеп гуртын горд сюйлэсь арбериос лэсьтон киужез улӟытыны малпало. Кызьы азьвылгес вераз вал иворъёсъя «Удмуртия» агентстволы Сепысь лулчеберетъя юртын ужась суредась Екатерина Романова, соос вашкала киужлы ас палысьтызы пиналъёсты но егитъёсты, озьы ик туристъёсты дышетозы.

Роси конкурсын 38 улосвылъёс 58 ӵектосъёс вормизы. Соосты быдэстон понна радъясез — Елена но Геннадий Тимченкоослэн ӟечлэсьтон фондзы — 32,2 миллион манет висъялоз. Тужгес бадӟымез грант 700 сюрс манет луоз.

Таяз арын вожвылъяськонэ 75 улосвылъёсысь 1 сюрс 11 куриськонъёс вуизы. Конкурслэн нырысетӥ люкетаз 182 ӵектосъёсты бырйизы. Финалын экспертъёс пусйизы пиналъёс но егитъёс понна чаклам, озьы ик покчи каръёсы но гуртъёсы тросгес туристъёсты кыскыны луонлык сётӥсь ӵектосъёслы.

«Ми понна конкурслэн валтӥсь емышез — адямиослэн ас вордскем интызэс ас кужыменызы умоятыны быгатозы шуыса осконзы кылдон. Ми адӟиськомы, вормись ӵектосъёсты быдэстон улсын соос борды карын, гуртын улӥсьёс но итӥсько, пумен со быдэс сообществолэсь улонзэ воштэ. Со азинскыны кутске», — вераз ӟечлэсьтӥсь фондлэн кивалтӥсез Мария Морозова. Солэн кылъёсызъя, «Культурная мозаика малых городов и сёл» конкурс улсын Россиысь пӧртэм улосвылъёсын 200-лэсь трос ӵектосъёс быдэстэмын ни.

Финалистъёс ӵектосъёс 2017-тӥ арысь 1-тӥ гудырикошконысен 2018-тӥ арысь 31-тӥ пӧсьтолэзёзь улонэ пыӵатозы.

Тодэ вайытом, «Культурная мозаика малых городов и сёл» ӵектослэн кыкетӥ люкетаз Сепысь но Лудорвайысь ӵектосъёс сяна, Эграысь «Дыханье старых стен» Кезысь «Дорогой Мессершмидта» но Дэриысь «Массовое мероприятие как фактор развития внутреннего туризма» IX Международный фестиваль творчества им. Д. К. Зеленина «Окно в небо» ӵектосъёс.

2016-тӥ арын «Культурная мозаика малых городов и сёл» ӵектослэн конкурсъёсаз вормисьёс пӧлы шедизы Глаз ёрослэн «Улэп куаралэн храмез» но «ДондыДор» ӵектосъёсыз.

Поделитесь с друзьями:

Контентмейкер, мемолог и журналист

Дом Дружбы народов
Добавить комментарий