Удмуртиын егитъёслэн улосвылкуспо форумзы ортчоз

Таӵе форум асьме улосвылын нырысьсэ ортчытӥське. 40 егитъёс — бесерманъёслэн, хантыослэн, челканъёслэн, долганъёслэн, ненецъёслэн, эвенкъёслэн, саамъёслэн, шорцы калыклэн, абазинъёслэн нагайбакъёлэн ыстэм муртъёссы — форуме пыриськыны мылкыд каремзы сярысь веразы ни.

Форумлэн валтӥсь ужпумез — ӧжыт лыдъем выжы калыкъёслэсь кылзэс но лулчеберетсэс утён уже егитъёсты кыскон, ужан амалъёсын тодматскыны луонлык сётон.

Форуме пыриськисьёсты паськыт программа возьма — Россиысь ӧжыт лыдъем выжы калыкъёслэн туала югдурзы но азинскыны луонлыкъёссы сярысь экспертъёсын вераськон, со калыкъёслэсь кылъёссэс но лулчеберетъёссэс утён но азинтон ласянь устооссэ ӵектосъёсты эскерон, «Печа-куча» форматэн калыкъёсын тодматон. Калыкъёслэн эшъяськон юртазы Удмуртиысь ӧжыт лыдъем калыклэн — бесерманъёслэн — улон-вылонзылы но лулчеберетсылы сӥзем адӟытон ужалоз.

26-тӥ шуркынмонэ форуме пыриськисьёс Юкаменск ёросэ поталозы. Отын Шамарданысь Бесерман лулчеберетъя центрлэн ужаменыз, фольклор коллективъёсын тодматскозы.

Форуме ӧтемын 18–35 аресъем егитъёс, кин ас калыкезлэсь сям-йылолъёссэ, лулчеберетъя дунлыкъёссэ эскерон но утён ужен выре. Ужрадэ пыриськыны быгато студентъёс, аспирантъёс, егит тодосчиос, дышетӥсьёс, мер огазеяськонъёслэн азьветлӥсьёссы.

Ватсан: ӧжыт лыдъем выжы калыкъёсты азинтонлы Россиын али бадӟым саклык висъяське. Кызьы пусъё форумез радъясьёс, вань ужпумъёс, кудъёсыз со калыкъёслэсь аспӧртэм лулчеберетсэс но кылзэс утёнлы гинэ ӧвӧл, быдэс калыкъёс бырозы шуыса кышкытлык кылдыто. Сюлмаськытэ ӧжыт лыдъем калыкъёслэн лыдзылэн кулэсмемез но. 2002–2010 аръёсы бесерманъёс (Удмуртиын улӥсь ӧжыт лыдъем финн-угор выжы калык) 30 процентлы кулэсмизы — 2 сюрс 998 адями вал, кылиз 2 сюрс 111. Ижоръёс (Ленинград улосвылын улӥсь ӧжыт лыдъем финн-угор выжы калык) 2002-тӥ арын 327 адями пусъемын вал, 2010-тӥ арын — 266. Водьёс (Ленинград улосвылын улӥсь ӧжыт лыдъем финн-угор выжы калык) 100 адямилэсь ӧжыт кылемын. Пиналъёслэн егитъёслэн йӧскалык асваланзы кулэсме. Ӵем дыръя анай кылэз огшоры улонын но семьяын кулэ уг каро.

Дом Дружбы народов
Добавить комментарий