Тӧдьы-лыз-горд данъяськон

Туала вакытэ кадь тусо куншет юнматэмын вал 1896-тӥ арын, Николай II эксэй кивалтыны кутскыку. Совето власть дыръя куншетмы «гордэктӥз». 1991-тӥ арын 22-тӥ августэ тӧдьы-лыз-горд гожъёсын куншетмы берытскиз. Сое табере быдэс кунэн сӥлы кариськомы арлы быдэ.

10-тӥ августэ ялэмын вал Россилэн куншетэзлэн эстафетаез. Тӧдьы-лыз-горд гожъёсын маке кузьда флаг ортчиз ваньмаз сямен ёросъёстӥ. Радъяськизы кунлэн валтӥсь пусъёсызлы, историезлы сӥзем визьсынанъёс, мастер-классъёс.

Ёросъёс пыр ортчем куншет 22-тӥ августэ вуиз Иже. Шор карлудысен «Пыраклы Россиен» синпелетозь сое нуизы Ижысь нимо-дано адямиос. Монумент дорын радъяськиз шулдыр концерт. Со сяна, усьтэмын вал пичи азбаръёс: покчиос ог-огзылэн бамъёсазы аквагрим амалэн куншетлэсь суредзэ пуктӥзы, мукетъёсыз тротуар вылэ мелэн суредаськизы, куинетӥосыз викторинае пыриськизы.

Нош егитъёс мылкыд каризы «Россилэн пусъёсыз» флешмобе лыктыны. Радъяз сое Нылпиослэн элькун библиотеказы. Ижысь Пушкинской ураме потӥзы уно нылъёс но пиос. Киосазы тӧдьы, лыз, горд шаръёс, мӧляосазы бырттэмын куинь гожен лентаос. Кин ке вӧлъяса возе Россилэсь бадӟым куншетсэ. Пушкинской урам кузя ширтӥсь машинаос егитъёслэсь флешмобзэс, сигнал сётыса, пумитазы.

— Таӵе ужрадъёс пиналъёслэсь кунмы сярысь тодон-валанзэс будэтыны юртто, Атыкай музъемен данъяськон мылкыд пыӵато. Нылпиослэн каникулъёссы ай, но учке, кӧня кузя соос вуизы та ужрадэ! — вера Нылпи библиотекалэн кивалтӥсез Людмила Жикина.

Куншетлэсь нуналзэ пусъён туэ азьвыл аръёслэсь паськытгес ортчиз. Ижысь калык озьы ик мыло-кыдо пыриськиз «Ми — Россилэн кунмуртъёсыз», «Атыкай музъемлэн куинь буёлэз», «Триколор» ужрадъёсы. Куншетэз сӥлы карон ужрад йылпумъяськиз эктонэн: егитъёс понна радъяськиз 3 буёло ӝыт дискотека.

http://udmdunne.ru/2018/08/t%D3%A7dy-lyz-gord-danyaskon/

 

Контентмейкер, мемолог и журналист

Дом Дружбы народов
Добавить комментарий