«Тысь» фестиваль: мар дауртӥське туала удмурт культураын?

Ӝыт кутскиз юан бордысен: мар дауртӥське туала удмурт культураын? Тодосчи Альберт Разин шуиз: егитъёс азьпала мыныны  туртто, Запад пала учкыса, нош отын ӧвӧл лул, ӧвӧл калык культура. Утёно асьмелэсьсэ.

Удмурт литература, дӥськут дизайн, эктон, крезьгур дунне… Дарали Лели, фестивалез радъясь, удмурт культуралэсь вань сэрегъёссэ возьматыны тыршиз кадь. Тани куиськыны но черсӥськыны дышето Киужъёсъя элькун юртысь Татьяна Тихонова но Лиля Леонтьева. Вӧзазы ик — дизайнеръёслэн но дӥсь вурисьёслэн лавкаоссы. Нокинлы мӧзмыны маза ӧй вал, шудонэ потэм кадь. Чузъяськизы выль произведениосысь  чуръёс: Маша Векшина но Дарали Лели лыдӟизы романысьтызы люкетъёсты.

Собере азбар кузя вамыштӥзы модалиос. Вылазы —  Софи Разиналэн но Дарали Лелилэн дӥськут бичетъёсы. «Тулыспал» — нимаське нырысетӥез. Софи Разина тырше Удмурт кун университетысь модая лабораториын, коллекциез шоры учкыса, 60-тӥ аръёсысь «Наталь» опера, «Италмас» ансамбльлэн 90-тӥ аръёсысь дӥсьсы тодэ лыкто. Дарали Лелилэн бичетэзлэн дӥньыз — вашкала удмурт  дэрем. Дӥсезлэн басмаез синмез кыске — таиз дэремлы жар-птица тылыоссэ кузьмам, мукетызлы — возьёс сяськаоссэ сётӥллям, тропик нюлэсъёс — куаро писпуоссэ. Бичетэз но озьы ик нимаське «Гуль, яке Лымшор удмурт тропикъёс».

Дыр ортче, удмурт культураын кылдо выль нимъёс. Татарстанысь Павел Александровлэн гуръёсыз бавлы удмуртъёслэн сям-йылолъёсынызы пыӵамын. Туэ со выжы калыкъёслэн «Евровидениязы» ветлӥз, 3-тӥ инты басьтӥз.

Вашкала кырӟанъёсты быдэстӥз Ижысь «Дукес» группа но. Кияса ёросысь Мария Бочкарёва удмурт эстрадаысь кырӟанъёсты тодэ вайытӥз, каверъёс кырӟаз, ачиз ик синтезаторен шудӥз.  Можгалась Мария Гроздовалэсь но Башкириысь Ксения Ахметхановалэсь творчествозэс туала поп ӧре пыртыны луэ. Одӥг ар вис каремзы бере сцена вылэ потӥз «Сайлент Ву Гур»  группа. Быдэс азбар тыр чузъяськизы инди-рок шӧмо кырӟанъёс.

Таӵе ужрадъёс бере валаськод: сомында быгатӥсь егитъёс уло вӧзамы, кырӟан, верос каллен-каллен гожъяло, но малы ке ӧжыт пӧламы соосты огазе бичасьёс, Дарали Лели кадь, та выллем фестивальёсты радъясьёс. Оло, кылдытоно ужрадъёсын вырись, азьветлӥсьёсты дасясь школа?

http://udmdunne.ru/2017/06/tys-festival-mar-daurt%D3%A5ske-tuala-udmurt-kulturayn/

 

Контентмейкер, мемолог и журналист

Дом Дружбы народов
Добавить комментарий