Татарстанысь удмуртъёс егитъёссылы ужрадъёс пусйизы

Калык лулчеберетъя лагерь сменаез пӧсьтолэзе ортчытыны чаклало. Отчы Татарстанысь школаосын 8–10 классъёсын дышетскись удмурт пиналъёс пыриськозы.

«Милям татын анай кылъёсъя конференци ортчиз, со котькуд ар ортче, Татарстанысь удмурт пиналъёслэн ляб тодонлыкъёссы шараяськизы. Соин ми малпаським, сыӵе лагерез кылдытыны кулэ шуыса. Пиналъёслэн тунсыксы мед кылдоз, ужъёссы умоесьгес мед луозы», — вераз «Татарстан Элькунысь удмуртъёслэн йӧскалык лулчеберетъя автономизы» улосвыл мер огазеяськонлэн быдэсъясь кивалтӥсез Марина Иванова.

Солэн кылъёсызъя, лагерь ортчытыны инты быръемын ӧвӧл на, но солэсь ужанрадлыксэ дасян борды басьтӥськизы ни.

«Татарстанын туж трос автономиослэн асьсэ лагерьёссы луо, соослэсь ужан амалъёссэс, «Шундыкарысь» басьтыса, Башкириысь «Усточикарысь», турттӥськом кылдытыны лагерь», — ватсаз Татарстанысь удмуртъёслэн автономизылэн быдэсъясь кивалтӥсез.

Удмурт егитъёслы форумез Менделеевскын 22–24 инвожое ортчытыны малпало. Форумлэсь ужанрадзэ дасян кутскемын ни.

«Таӵе форумъёс туж трос ортчо Удмуртиын, котькуд ар ми отчы ветлӥськом. Тани кылем арын «Удмурт-а мон?» вал форум. Татын та форумлэн валтӥсь ужпумез — удмурт егитъёслэсь огазеяськонзэс кылдытон. Казаньын актив вань, табере быдэс элькунын мед луоз. Адӟем карыны вань кинлэсь, туж умой кема ни ужа «Шунды». Со порма огазеяськон милям но кылдытыны дыр вуиз, дыр, шуыса малпаськомы ми, малы ке шуоно егитъёс вань, мылкыдзы вань», — вераз Марина Иванова.

Тодэ вайытом, Татарстанысь удмуртъёслэн йӧскалык автономизы нылпи садэ ветлӥсь пиналъёс понна «Мудорвай» конкурсэз но туэ нош ик ортчытоз. 

Дом Дружбы народов
Добавить комментарий