Татарстанысь Нижнекамскысь Калыкъёслэн эшъяськон юртазы удмуртъёслэн огазеяськонзы кылдӥз

Татарстанысь удмуртъёслэн автономизы кичӧлтэмен Нижнекамскын удмурт лулчеберетъя йӧскалык огазеяськон 2016-тӥ арын толсуре кылдӥз ни, нош табере ёросысь удмурт азьветлӥсьёс асьсэ кабинетын ужаны быгатозы. Огазеяськонэн карын улӥсь удмурт воргорон Илья Фёдоров кивалтэ.

«Ильялы кык ар талэсь азьвыл ик ужрадъёсы, удмурт фестивальёсы пыриськыны тунсыко потэ вал ни. 2016-тӥ арын ми сое Гербере ӧтьылӥм, солэн аслаз но та праздникез адӟемез потэ вал. Тодматскеммы бере ӵектӥм солы Нижнекамскысь удмурт центрен кивалтыны», — шуиз Татарстанысь удмуртъёслэн автономизылэн тӧроез Андрей Герасимов.

Татарстанысь удмуртъёслэн автономизылэн тӧроез верамъя, туннэ нуналлы Нижнекамскын 700 пала удмуртъёс уло, соос пӧлысь тямысэз огазеяськонлэн азьветлӥсьёсыз луо. Калыкъёслэн эшъяськон юртазы сэрег висъямен соослэсь лыдзэс будэтыны луоз, малпа Андрей Герасимов.

«Вань вӧлмет, соин ик удмурт калыклэсь лулчеберетсэ но сям-йылолъёссэ азинтонъя йӧскалык движение ёросысь удмуртъёсты кысконо», — шуиз  Андрей Герасимов.

Со сяна, мер огазеяськон азьын мукет но ужпумъёс сыло. Кылсярысь, Нижнекамск ёросысь удмуртъёслэсь лулчеберетсэс утён но азинтон, мукет калыкъёсын кусып возён но карлэн, ёрослэн но элькунлэн мерлыко ужаз пыриськон.

Ватсалом, Татарстанысь удмуртъёс туэ ӝыны ар куспын 32 ужрад ортчытӥзы. Со сярысь «Удмурт Кенеш» огазеяськонлэн Пичи кенешезлэн пумиськоназ улосвылысь удмуртъёслэн автономизылэн кивалтӥсезлэн воштӥсез Марина Иванова ивортӥз. Со верамъя, сыӵе юн ужаны луонлык кылдӥз автономилы тӧрое Андрей Герасимовез быръемен валче.

http://udmurt.media/udm/news/obshchestvo/29429/

 

 

Поделитесь с друзьями:

Контентмейкер, мемолог и журналист

Дом Дружбы народов
Добавить комментарий