Россиысь фин-угор калыкъёслэн куатетӥ ӧтчамзы Коми Республикаын ортчоз

Пумиськон дыръя трос вераськон мынӥз мордва кылэз дышетон сярысь, угось Ульяновскын улӥсь фин-угоръёсты чаклано ке, пӧлазы тужгес трос мордваос. Валамон, соос Мордовилэсь кыдёкын уло бере, анай кылзэс дышетонъя шугъяськонъёссы ӧжыт ӧвӧл. Но та югдурез тупатыны юрттоз, пе, мордва кылэз онлайн амалъя дышетон.
 
Со сяна, АФУН-лэн кенешаз вераськон мынӥз Россиысь фин-угор калыкъёслэсь куатетӥ ӧтчамзэс ортчытон сярысь. Со 4 арлы одӥг пол радъяське. Берлоез ӵапак Мордовиын ортчиз вал. Люкаськемъёс огкылэ вуизы: тазэ съездэз Коми Республикаын туэ сӥзьыл, 27-тӥ-30-тӥ сентябре, ортчытоно.
 
— Кыӵе ужпумъёслы сӥземын луоз съезд, али рос-прос тодмо ӧвӧл на. АФУН-лэн кивалтӥсез Пётр Тултаев вань фин-угоръёс азе ужпум пуктӥз: малпаськоно, дэмланъёс сётоно. Али интыосын кенешонъёс мыно. Нош тулыс ми (АФУН-лэн кенешаз пырисьёс) нош ик пумиськылом, соку ини вераны луоз, кыӵе секциос ужалозы съездын но марлы тужгес бадӟым саклык висъяськоз, — ивортӥз АФУН-лэн кенешезлэн ёзчиез Сергей Касаткин.
 
Нялтас вераса, Фин-угор калыкъёслэн нырысетӥ ӧтчамзы ортчиз «Удмурт Кенеш» огазеяськонлэн кичӧлтэмезъя 1992-тӥ арын Удмурт шаерын. Та съездын ик кылдӥз Россиысь Фин-угор калыкъёслэн ассоциацизы.

Дом Дружбы народов
Добавить комментарий