Пумиськом Герберын!

Пусйыны кулэ, Гербер шулдыръяськонъёс быдэс нунал ӵоже кыстӥськозы – кутскозы 9 но ӝыны часын, нош йылпумъяськозы 11часын ӝытазе. Со дыр куспын ортчытэмын луозы пӧртэм ужрадъёс, ужалозы 15 пумо площадкаос.

Озьыен, ӵуказе тӥледыз витё шулдыръяськон интыос:

«Куно пумитан» — празднике лыктӥсьёсты пумитан инты.

«Тӧршор» — шор сцена, отын театр возьматон, фольклор коллективъёслэн концертсы но гурт возёсысь азинлыко ужасьёсты пусъён ортчоз.

«Нюлэс гур» — валтӥсь сцена, отын Удмуртилэн ёросъёсысьтыз но Россилэн улосвылъёсысьтыз профессиональной но самодеятельной коллективъёслэн возьматонзы луоз.

«Мудор» — ӝукез вӧсян инты.

«Кунокуа» — Удмуртиысь, Россиысь но кунгож сьӧрысь делегациос понна азбаръёс.

«Усточикар» — Удмуртиысь кибашлыослэн ужъёсынызы адӟытон.

«Вузкаронни» — Удмуртиын но мукет улосвылъёсын поттэм вузъёсын но сиён-юонъёсын вузкарон.

«Пичи Гербер» — пиналъёс но быдэ вуымтэос понна калык шудонъёсын но ӵошатсконъёсын инты.

«Батыр шудонъёс» — удмурт музъем вылысь батыръёс кужмо но етӥз луэмзэс возьматозы.

«Эмъяськонни» — ӝог эмъюрттэт сётон инты. Отын котькуд мылкыд карись вирзӥбетсэ, мугорезлэсь секталазэ мертаны, синзэ эскертыны, эмъюм турынъёсын чай юыны быгатоз.

«Кышкасьтэмъёс» — Удмуртиысь МЧС-ысь ӧнерчиос тылпулэсь утиськон сярысь тунсыко амалэн вералозы.

«Веник керттон» — эмъюм турынъёсын суро кызьпу веник керттозы.

Удмуртъёслэн эктонъёссылы дышетозы «Эктон возьын», нош удмурт кырӟанъёсты быдэстыны луоз «Кырӟан бусыын». Ӝытазе егитъёслэн «Шунды» огазеяськонзы «Шундэктон» площадкае ӧте.  

Дом Дружбы народов
Добавить комментарий