Пичи Пургаын «Пурга Минё» фестиваль ортчоз

«2015-тӥ арын утчам ке Пурга мунёез, кыӵе луыны кулэ Пурга мунё шуыса, туэ кӧня ке воштӥм ӧрмес, – вера Пичи Пурга ёрос библиотекаен кивалтӥсь Людмила Шумилова. – Туэ ми сӥзиськом та фестивальмес театр мунёлы. Малы со борды кутским? Малы ке шуоно, театр мунё но театр искусство, мунё театр семьяосты герӟаны быгатозы шуыса малпам: тани ӵош ужалозы, ӵош мунёен вырозы, ӵош возьматон лэсьтозы. Сыӵе малпанмы».
 
Туэ фестивальын кык номинациос луозы — театр мунё но калык выжыкылъёсъя, легендаосъя театр возьматон.
«Со калыкъёс, кудъёсыз уло ёросамы, котькудзы асьсэлэсь мифологизэс, асьсэлэсь выжыкылзэс возьматыны быгатозы», — валэктӥз библиотекаен кивалтӥсь.
 
Ужъёсты кутозы 20-тӥ южтолэзёзь. Радъясьёс оско, фестивале котькуд муниципал кылдытэтысь пыриськисьёс луозы шуыса. Людмила Шумиловалэн верамезъя, юалляськисьёс туннэ ик вань ини.
 
«2015-тӥ арын милям туж трос пыриськисьёсмы вал. 230-лэсь трос мунёос вуизы фестивале. Туэ, оло, ӧжытгес но луоз, малы ке шуоно тематикаез но секытгес. Со ваньмызлы тодмо ӧвӧл. Соин ик ми тани али Удмуртиысь кун мунё театрен но вераським. Соос милемлы юрттэт сётом шуизы мастер-классъёс но лэсьтыны. Малы ке шуоно тросэзлы валамон ӧвӧл, мар со театр мунё», — шуиз со.
 
Нырысетӥяз фестивале пыриськись мунё лэсьтӥсьёс ужазы пӧртэм материалъёс кутӥзы: басма, куро, пу, горд сюй, поролон но мукет. Тужгес бадӟымез мунё ӧжытэзтэк одӥг но ӝыны метр ӝуждалаем вал. Сое лэсьтӥз Пичи Пургаысь кибашлы Татьяна Панфилова.
 
Вераны кулэ, фестивальлэн ниманаз «минё» кылын янгыш лэсьтэмын ӧвӧл. Озьы радъясьёслэн сое Пичи Пургаен герӟамзы потэм. Малы ке шуоно со палан улӥсьёс «мунё» кылэз ӵапак «минё» шуо.
Нырысетӥ фестиваль улсын лэсьтэм кӧняез ке ужъёс ёрос библиотекалэн фондаз кылемын, соос адӟытонэ поттэмын. Нош куд-огез кузёоссы киын, фестивале уго семья узырлык луись мунёоос но поттэмын вылэм. Таяз фестивале пыриськисьёс но ас ужъёссэс мылкыдзыя библиотекае кельтыны быгатозы. Берлогес соосъя ини выль адӟытон радъяськоз.

Дом Дружбы народов
Добавить комментарий