«Пичи кылчи» «Мынам Удмуртие» телеканаллэн выль проектэз. Удмурт кылэз дышетыны телестудие таяз радэ лыктӥзы Лера но Ульяна. Cоос асьсэос но дышетскизы, телевизор учкисьёсты но дышетӥзы. Малыок но тодӥсь-валась Бӧтьырок таяз программаын нылъёсты ымныр люкетъёсын тодматӥзы.
«Али тросэз нылпиосмы удмурт кылын валало, нош ӟуч кылын вазё, — шуэ «Пичи кылчи» проектлэн авторез Ольга Ардашева. – Нош кыӵе умой луысал, соос тыныд удмурт кылын ик вазьысалзы ке. Ми анай-атайёсты, песянай-песятайёсты но ӧтиськомы экран азе. Нылпи огназ медам учкы, соос куспын кыӵе ке но диалог мед луоз. Собере ми солы гуртысь уж сётӥськом. Сое быдэстыны ӵыжы-выжыосыз мед юрттысалзы».
«Пичи Кылчи» арнялы быдэ «Мынам Удмуртие» телеканаллэн эфираз поталоз. Нош адӟытонэ шедён понна, радъясьёслы вазиськоно. Малыок но Бӧтьырок удмурт кылэз дышетыны мылкыд карись покчиосты али но возьмало.
