Ойдолэ «Палэзяны»

21-тӥ куарусёнэ 17 час но 30 минутэ «Палэзян» фестиваль усьтӥське егит удмурт суредасьлэн Анна Образцовалэн «Ватэм пусъёс» адӟытонэныз. Интыяськоз со Калыкъёслэн Эшъяськон юртазы.

Анна Образцовалэн ужъёсыз кылдытэмын пӧртэм выжы калыкъёслэн дунне шоры учконъёссы вылэ пыкиськыса. Анналы аслыз тунсыко дуннелэн кылдэмез сярысь пӧртэм калыкъёслэн мифъёссы. Егит суредась пусйе: «Вань мифъёсын тунсыко кышномуртлэн культэз. Нырысь ик со – анай. Со образ матын котькуд этнослы. Со сяна мыным тунсыко пӧртэм осконъёсты эскерыны, шедьтыны соослэсь маин ке но огкадь луэмзэс. Шуом, буддизмен герӟетъёс. Со оскон шуэ: "Ул тон гань-гань, дыртытэк. Ул, тыршы, шумпот, инмарлы «тау» шу".

Анна суредась сяна, кырӟась но. Адӟытонлэн усьтоназ со ачиз быдэстоз удмурт калык кырӟанъёсты.

Егит суредасьлэн Анна Образцовалэн адӟытонэз «Палэзян» фестиваль пумозь кыстӥськоз.

18 часын егит гожъяськисьёслэн «Ингож» альманахенызы тодматскон кутскоз. Отчы удмурт литераторъёс но лыктэм куноос пыриськозы.

19 часын «Эктон корка плюс» калык эктонъёслы сӥзем ӝыт ужзэ мытоз. 

Дом Дружбы народов
Добавить комментарий