Дом Дружбы народов /
  • Иворъёс
  • Нырысетӥ «Стоунхендж» кылдоз Удмуртиын ленд-артъя «Легенды ДондыДора» фестиваль улсын
  • Нырысетӥ «Стоунхендж» кылдоз Удмуртиын ленд-артъя «Легенды ДондыДора» фестиваль улсын

    8 июня 2018 г.


    20–24 инвожое Глаз ёросысь Адам гурт вӧзысь лулчеберетъя но историяя «ДондыДор» паркын Удмуртиын нырысетӥез «Стоунхендж» кылдоз. Со сярысь 7-тӥ инвожое фольклоръя гужем фестивальёслы сӥзем пресс-конференциын Глаз ёросысь лулчеберетъя но туризмъя центрысь туризмъя ёзэтлэн кивалтӥсез Алексей Дьяконов ивортӥз.

    Арт-объект ленд-артъя «Легенды ДондыДора» нырысетӥ элькун фестиваль улсын лэсьтэмын луоз. Ужрадэ Удмуртиысь, Пермь, Киров но Свердловск улосвылъёсысь кибашлыос люкаськозы. Соос пӧртэм инкуазь материалъёслэсь кабъёс кылдытозы.

    «Милемлы трос эскизъёс ыстӥзы ни, со эскизъёсын ми ужаськомы ни. Милям Удмуртиын нырысетӥез «Стоунхендж» кылдоз. Ӵапак 22-тӥ числое шунды берытскон дыръя милям пырак со точкаын шунды ӝутскоз», — вера Алексей Дьяконов.

    Радъясьлэн кылъёсызъя, Стоунхендж сяна, «ДондыДор» паркын часъёс, бадӟым ӟечыран, туспуктон инты, Дондылэн тронэз но мукет кабъёс лэсьтэмын луозы. Синпелетъёслы валтӥсь курон — интерактивность.

    «Одӥгез валтӥсез курон — со интерактивность. Озьыен, уг яра огшоры пирамида лэсьтыны. Кулэ, адями соин маке карыны мед быгатоз шуыса», — шуиз Алексей Дьяконов.

    Тодэ вайытом, вань ужан арбериосты но инкуазь материалъёсты кибашлыослы радъясьёс сётозы. Конкурсантъёс сяна, фестивале огшоры адямиос но пыриськыны быгато. Соос понна суредась Анатолий Степанов ленд-арт синпелетъёсты кылдытонъя мастер-класс ортчытоз.

    Ватсалом, туэ гужем Удмуртын даслэсь трос элькун, улосвылкуспо но калыккуспо фестивальёс радъяськозы.

    https://udmurt.media/udm/news/kultura-i-turizm/37382/

     

    Туспуктэм: Алёна Селезнёвалэн.