Нырысетӥ Ашальчи Оки лыдӟонъёс ортчозы Можгалан

Кызьы тодмо, 4-тӥ оштолэзе вордӥськем нуналыз нырысетӥ нылкышно кылбурчилэн, Росси Федерациысь дано эмчилэн Акилина Григорьевна Векшиналэн – Ашальчи Окилэн. Таяз арын Удмурт нылкышно кенеш та удмурт калыклэсь дано нылзэ сӥлы карон вылысь быдэс толэзь ӵоже пӧртэм ужрадъёс ортчытэ. Гурт нылкышно клубъёсы ветлӥсь нылкышноос пырисько «Лыдӟиськом Ашвльчи Окиез» нимо акцие. Туннэ нуналлы та тунсыко ужрадэ кыстӥськизы ни 10 еросъёсысь клубъёс.

27-тӥ оштолэзе Можга педколледжын нырысьсэ радъяськозы «Ашальчи Оки» лыдӟонъёс, кытчы нимысьтыз ӧтемын 6 еросъёсысь гурт нылкышно кылбурчиос. Нылкышно кенеш Правленилэн ёзчиосыз Нырысетӥ лыдӟонъёслы аспӧртэм программа дасяло. Нырысь ик ортчоз Ашальчи Окилэсь творчествозэ тодонъя «Тон юад мынэсьтым…»нимо баттл. Гожъяськон удысэ кыстӥськись нылкышноос понна тодмо нылкышно кылбурчиос «Кылбуран кунокуа» радъялозы.Собере Удмурт нылкышно кенеш тужгес адӟем карымон анайесты «Кылбурась анай сюлэм» нимын пусйез.

Та ужрадын ик Ашальчи Оки нимо йӧскалык премиез сӥе-дано сётыны чакламын. Туэ сое басьтозы Кияса еросысь Вуж Салья гуртысь «Нылкышно шуд» клублэн кивалтӥсез Марина Морякова но Удмурт Элькунысь Нылкышно кенешен кивалтӥсь, Кун премилэн лауреатэз, Удмурт Элькунысь дано журналист Надежда Степанова.

Тодады вайытӥськом, та премиен «Удмурт Кенеш» огазеяськон пусъе удмурт калыклэсь асваланзэ, лулчеберетсэ, кылзэ, улэм-вылэмзэ азинтыны быгатӥсь, удмурт движение мыло-кыдо пыриськись нылкышноосты. Сӥе-дано ужрадэ озьы ик ӧтемын «Удмурт Кенеш» огазеяськонлэн исполкомезлэн ёзчиосыз но.

Нырысетӥ Ашальчи лыдӟонъёс кутскозы 11 часын, Ашальчи Оки прмиез сӥе-дано сётон ужрад-13 часын.

Дом Дружбы народов
Добавить комментарий